सभामुख र अर्थमन्त्रीद्वारा तातोपानी नाकाको निरीक्षण

तातोपानी । नेपाल–चीन बीचको उत्तरी सीमा तातोपानी नाकासम्म पुगेर सभामुख अग्निप्रसाद सापकोटा र अर्थमन्त्री जनार्दन शर्माले निरीक्षण गरेका छन् ।

उनीहरुले बाह्रविसेदेखि नेपाल चीन सीमासम्मको २६ किलोमिटर सडकमा गर्नुपर्ने मर्मत तथा नयाँ निर्माणका लागि समेत निरीक्षण गरेका हुन् । भूकम्पपछि अस्थीर रहेको तातोपानी नाका प्रभावकारी रुपमा सञ्चालन गर्नका लागि स्थानीय व्यवसायी, तातोपानी भन्सार कार्यालयका प्रमुख लगायतसँग छलफलसमेत भएको छ । निरीक्षण पछि सभामुख र मन्त्रीसहितको टोलीले मितेरी पुल, व्यापारिक बजार लिपिङको अवस्थालाई गम्भीर रुपमा लिएको बताएका छन् ।

बाह्रविसेदेखी कोदारीसम्मको विकासलाई बहुवर्षिय योजनाको रुपमा लैजानुपर्ने भन्दै सभामुख सापकोटाले त्यसको लागि अल्पकालिन र दीर्घकालिन खाका बनाएर अगाडी बढ्नुपर्नेमा जोड दिए । ‘दीर्घकालिन रुपमा धुलिखेलदेखि कोदारीसम्मको सडकलाई दुईलेनको बनाउन सकिन्छ’, उनले भने– ‘अल्पकालिन रुपमा भने बाह्रविसेदेखि कोदारीसम्मका भत्किएका र बिग्रिएका संरचनाहरुलाई तत्काल निर्माण गर्नुपर्ने देखिन्छ ।’ सभामुख सापकोटाले त्यसको लागि बजेट छुट्याउन अर्थमन्त्री जनार्दन शर्मालाई आग्रह गरे ।

सभामुखसँगै नाका निरीक्षणका लागि पुगेका अर्थमन्त्री जनार्दन शर्माले तातोपानी नाकालाई सहज बनाउन कुटनीतिक पहल भईरहेको जनाए । ‘तातोपानी नाकालाई सुदृढ बनाउँदै व्यवसायलाई सहज बनाउन कुटनीतिक पहल भईरहेको छ’, शर्माले भने– ‘पहिलेको तुलनामा नाकामा उल्लेख्य सुधार भईसकेको र अझ यो नाकालाई विस्तार गरेर जानेकुरामा चीन सरकारसँग सहमति समेत भईसकेको छ ।’

लिपिङ बजार सीमा पुलसँग जोडिएको बजार हो । भूकम्पपछि यहाँको अवस्था दयनीय छ । यो बजारमा भूकम्पअघि दैनिक करोडौंको कारोबार हुनुका साथै ठूला ठूला होटल, बैंकलगायत कारोबार हुने व्यापारिक पसलहरु थिए । यसलाई पुनः सूचारु गरिनुपर्नेमा स्थानियले जोड दिएका छन् ।

सोे क्षेत्रमा २०७१ सालमा आएको जुरे पहिरो, २०७२ सालको भूकम्प, २०७३ को भोटेकोशी बाढी, २०७४ मा लार्चा पुल पहिरोमा परी बगेको, २०७५ मा साँधी खोलाले पक्की पुल बगाएको, २०७७ सालमा बाह्रविसे नगरपालिकाको जम्बु, खागदल र भोटेकोशी गाउँपालिकाको लार्चामा आएको बाढी, पहिरोका कारण राजमार्गमा ठूलो क्षति पुगेको थियो । भूकम्प, भोटेकोशी बाढी र विभिन्न समयमा आएका ठूला पहिरोका कारण केही बर्ष यता अरनिको राजमार्ग अन्तरगतको बाह्रबिसे तातोपानी सडक खण्डमा सहज आवागमन हुन सकिरहेको छैन ।

कोभिड–१९ महामारीका कारण सीमा क्षेत्रमा गरिएको कडाईका कारण तातोपानी नाकाबाट हुने आयात निर्यात समेत पुरानो अवस्थामा फर्कन सकेको छैन । यो क्षेत्र सभामुख सापकोटाको निर्वाचन क्षेत्र समेत हो ।