गाई काटेको आरोपमा ५ पक्राउ

चौतारा । गाई काटेको आरोपमा सिन्धुपाल्चोकको बाह्रबिसेबाट ५ जना पक्राउ परेका छन् ।

गएको कात्तिक २२ गते राति करिब ११ बजे बाह्रबिसे– ९ राम्चेको पोष्टपखेरामा गाई काटेर मासु भाग लगाइरहेको अवस्थामा उनीहरु पक्राउ परेका हुन् । पक्राउ पर्नेमा बाह्रबिसे नगरपालिका– ९ का ३२ वर्षिय अर्जुनबहादुर थामी, ३० वर्षिय राजकुमार थामी, त्रिपुरासुन्दरी गाउँपालिका– २ का ३० वर्षिय भिमबहादुर थामी, ३४ वर्षिय दिलबहादुर थामी र १९ वर्षिय विजय थामी रहेका छन् ।

स्थानीय मानबहादुर थामीको बारीमा गाँउकै अर्जुनबहादुर थामीको गाई काटी मासु भाग लगाई रहेका छन् भन्ने विशेष सूचनाको आधारमा उनीहरुलाई प्रहरीले पक्राउ गरेको हो । उनीहरुलाई मासु भाग लगाई रहेकै स्थानबाट पक्राउ गरेको जिल्ला प्रहरी कार्यालय सिन्धुपाल्चोकको प्रहरी नायव उपरीक्षक दक्षकुमार बस्नेतले बताए ।

पक्राउ परेका उनीहरुलाइ सिन्धुपाल्चोक जिल्ला अदालतबाट दिन ७ को म्याद अनुमति लिई पशुपन्छी सम्बन्धी कसूरमा अनुसन्धान प्रकृया अगाडी बढाईएको प्रहरीले जनाएको छ ।