आनन्द माविमा विद्यार्थीले लगाए ताल्चा

जलिवरे । विद्यालयको शैक्षिक वातावरणमा सुधार ल्याउन नसकेको भन्दै सिन्धुपाल्चोकको बलेफी गाउँपालिका– १ मा जलविरेमा रहेको आनन्द माविमा विद्यार्थीहरुले तालाबनद्यी गरेका छन् ।

बलेफी गाउँपालिकाको उपाध्यक्ष कमला कायस्थ विद्यालय व्यवस्थापन समितिको अध्यक्ष रहेको सो विद्यालयले विद्यार्थीको जायज माग माथि गरिएको वेवास्ता गरेको र विद्यालयको शैक्षिक वातावरणमा कुनैपनि सुधार नल्याएको भन्दै अखिल (क्रान्तिकारी) र नेपाल विद्यार्थी संघले अनिश्चित कालको लागि तालाबन्दी गरेको हो ।

गएको भदौ ३१ गते अखिल (क्रान्तिकारी) र नेपाल विद्यार्थी संघले विद्यालयमा भईरहेको शिक्षकको स्थायी दरबन्दी राहतसँग साट्ने काम बन्द गरी स्थायी शिक्षकको पदपूर्ति गर्नुपर्ने, प्रधानाध्यापकको तत्काल नियुक्ति गर्नुपर्ने, विभिन्न विषयमा भएको शिक्षक अभावको पूर्ति गर्नुपर्ने, विद्यालयको हिसाबकिताब सार्वजनिक गर्नुपर्ने लगायतका ७ बुँँदे माग राख्दै ७ दिने भित्र पूरा गर्न विद्यालयलाई ज्ञापन पत्रका बुझाएका थिए ।

विद्यालय व्यवस्थापन समितिको अध्यक्ष र विद्यालयलाई बुझाइएको ज्ञापन पत्रको दुई महिना बितिसक्दा पनि सम्बोधन नगरिएको भन्दै विद्यालयमा ताल्चा लगाउनु परेको अखिल (क्रान्तिकारी) आनन्द माविका इकाई अध्यक्ष सविना विकले बताईन् । ‘सत्ताको उन्मादमा गर्न खोजिएको नियम विपरितको क्रियाकलाप प्रति हाम्रो गम्भीर आपत्ति छ’, उनले भनिन्– ‘शिक्षकको स्थायी दरबन्दीको पद पूर्ति नगरी स्थायी दरबन्दी नै खारेज गरेर राहात दरबन्दी सिर्जना गर्न खोजिएको राजनीतिक कार्यकर्ताको भर्तिको निर्णय हामीलाई स्वीकार्य छैन् ।’

विद्यालयको पठनपाठन नियमित गर्न नसकेको र विद्यालयका विविध विकृति र विसंगतीको विरुद्धमा गरिएका हाम्रो जायज मागहरु यथाशिघ्र सम्बोधन नभएसम्म अनिश्चित कालका लागि तालाबन्दी जारी राख्ने नेपाल विद्यार्थी संघका इकाई उपसभापति अञ्जली तामाङले बताईन् । ‘हाम्रो आन्दोलनको व्यवास्ता गरी विद्यालय प्रशासनले कुनै हस्तक्षेप वा दमन गर्न खोजे उत्पन्न हुने परिस्थितीको जिम्मेवार विद्यालय प्रशासन स्वयम् हुनेछ’, उनले भनिन् ।