जन्मोत्सवको अवसरमा कार्कीको ‘विवृत जीवन’ लोकार्पण

चौतारा । समाजसेवी, शिक्षाप्रेमी तथा राजनीतिक व्यक्तित्व रामबहादुर कार्कीको ७७ओैं जन्मोत्सवको अवसरमा जीवन आयाम समेटिएको पुस्तक ‘विवृत जीवन’ लोकार्पण गरिएको छ ।

सिन्धुपाल्चोकको चौतारामा सोमबार नेपाल सरकारका पूर्व सचिव पुन्य न्यौपाने, चौतारा साँगाचोकगढी नगरपालिकाका प्रमुख प्रशासकीय अधिकृत फणिन्द्रप्रसाद पौडेल, चौतारा बहुमुखी क्याम्पसका प्राचार्य, नगेन्द्रप्रसाद दंगाल, श्रीकृष्ण रत्नगंगा माविका प्रधानाध्यापक ध्रुबलाल श्रेष्ठ, पत्रकार सुरेश कसजू, पुस्तक प्रकाशन समितिका संयोजक अमित घिमिरे र कार्की स्वयम्ले संयुक्त रुपमा पुस्तकको लोकार्पण गरेका हुन् ।

सो अवसरमा कार्कीलाई पुस्तक प्रकाशन समितिले अभिनन्दन समेत गरेको थियो । त्यस्तै दुःखी प्रकाशन सिन्धुपाल्चोकले कार्कीलाई सम्मान गरेको थियो । १ सय ८० पृष्ठको पुस्तकमा कार्कीको आत्मवृतान्त, कार्कीबारे लेखिएको लेख र कार्कीको विभिन्न क्षेत्रमा रहँदाका प्रतिनिधि तस्वीरहरु समेटिएको छ ।

सिन्धुपाल्चोकको स्याउले गाउँपञ्चायत– ३ अर्चलेमा २००२ मंसिर ६ गते जन्मिएका कार्कीलाई समाजसेवा, शिक्षा क्षेत्र र राजनीतिको त्रिआयमिक व्यक्ति मानिन्छ । दशकौं अघि नै अन्तरजातीय विवाह गरेर समाजसँग विद्रोह गरेका कार्कीलाई एक क्रान्तिकारी सोचाइका व्यक्तिको रुपमा चिनिन्छ । उनै कार्कीको संयोजकत्वमा बनेको समितिले सदरमुकाम चौतारामा चौतारा क्याम्पसको स्थापना गरेको थियो ।

जन्मोत्सव एवम् पुस्तक लोकार्पण कार्यक्रममा वक्ताहरुले कार्कीले समाज विकास, शिक्षा क्षेत्रको विकास र राजनीतिक आयामको चर्चा गरेका थिए । विवृत्त जीवन प्रकाशन समितिका संयोजक अमित घिमिरेको अध्यक्षतामा भएको कार्यक्रमलाई डम्बर रसिक भारतीले सञ्चालन गरेका थिए । विवृत्त जीवन प्रकाशन समितिको आयोजना तथा दुःखी प्रकाशनको सह–आयोजनामा भएको कार्यक्रममा बुद्धिजीवि, शिक्षाप्रेमी, साहित्यकार, सञ्चारकर्मीलगायत स्थानीयको बाक्लो उपस्थिति थियो ।