चौतारामा विप्लव नेकपाले मनायो पुनर्गठन दिवस

चौतारा । नेत्रबिक्रम चन्द ‘विप्लव’ नेतृत्वको नेपाल कम्युनिष्ट पार्टी स्थापना भएको ८ वर्ष भएको उपलक्ष्यमा सिन्धुपाल्चोकको चौतारामा र्यालीसहित सभाको आयोजना गरिएको छ । ।

चौताराको भिन्तुनाचोकबाट निकालिएको र्यालीमा सहभागिहरुले ‘दलालहरु होसियार’, ‘एमसीसी मुर्दावाद’, ‘मूल्यबृद्धि खारेज गर’, ‘आदेश देउ विप्लव दाई युद्ध गर्न तयार छौं’, ‘एकीकृत जनक्रान्ति जिन्दावाद’, जस्ता नारा लगाउँदै टुँडिखेल पुगेका थिए । नेपाल कम्युनिष्ट पार्टीका केन्द्रिय सदस्य पूर्णबहादुर सिंह, विशेष कमिटि सदस्य किरण घिमिरे, मुकुन्द श्रेष्ठ, दोलखा जिल्ला सेक्रेटरी माधव गौतमलगायतले सभालाई सम्बोधन गरेका थिए ।

सभालाई सम्बोधन गर्ने वक्ताहरुले जनयुद्ध सञ्चालन गरेका नेताहरू असफल, बदनाम र संसद्मा पतन भएपछि ८ वर्ष अघि विद्रोहको झन्डा उठाउनु परेको बताएका थिए । ‘क्रान्तिकारी कम्युनिस्ट आन्दोलनको रक्षा र नयाँ आधारमा पुनर्सङ्गठित विद्रोह थियो’, केन्द्रिय सदस्य सिंहले भने–‘ पार्टी पुनर्गठनपछि नेकपाले तय गरेको कार्यदिशा, नीति र कार्यक्रमहरूले पार्टी र अन्दोलनलाई देश, जनता र श्रमिक वर्गको मुक्तिको दिशातिर लगेर पुनर्गठनलाई व्यावहारिक रूपमै प्रमाणित गर्दै लगेको छ ।’

२०६९ सालमा पुष्पकमल दाहाल नेतृत्वको नेकपा (एकीकृत माओवादी) बाट विद्रोह गरी मोहन वैद्य ‘किरण’ नेतृत्वमा नेकपा–माओवादी गठन भएको दुई वर्षसम्म क्रान्तिको नयाँ कार्यदिशा तय हुन नसकेपछि २०७१ साल मङ्सिर ८ गते विप्लवको नेतृत्वमा नेकपा पुनर्गठन भएको दिनलाई नेकपाले पार्टी पुनर्गठन दिवसका रूपमा मनाउँदै आएको छ ।

नेपाल कम्युनिष्ट पार्टी सिन्धुपाल्चोक–दोलखाको आयोजना गरेको कार्यक्रम सिन्धुपाल्चोकका सेक्रेटरी युगिनको अध्यक्षतामा भएको थियो ।