रेडक्रसको वर्तमान समितिलाई याथवत राख्न सर्वोच्चद्वारा आदेश

चौतारा । नेपाल रेडक्रसको निर्वाचित कार्यसमितिबाट जिल्ला शाखाको नियमिति कार्य गर्न गराउन उच्च अदालत पाटनले अन्तरिम आदेश दिएको छ ।

नेपाल रेडक्रस सोसाइटी केन्द्रले मिति २०७८ असोज २२ गतेको निर्णयले सिन्धुपाल्चोक लगायत ६ वटा जिल्ला शाखा र तत्पश्चात १६ वटा जिल्ला तथा २ वटा प्रदेश समिति विघटन गरेका थिए । रेडक्रस केन्द्रले विधान बमोजिम जिल्लाहरुको निर्वाचन गर्नु पर्नेमा निर्वाचनको प्रक्रिया अवलम्बन नगरी संस्था नविकरण लगायतका कारण देखाई निर्वाचित जिल्ला कार्यसमितिलाई निरन्तरता दिएको अवस्थामा केन्द्रले तदर्थसमिति गठन गरेका थिए ।

निर्वाचनको बदला तदर्थ समिति गठन गर्ने जस्ता कार्य रेडक्रस विधान, सिद्धान्त र मर्म विपरीत रहेको भन्दै सिन्धुपाल्चोक शाखाले विघटन विरुद्ध उच्च अदालतमा दिएको रीट निवेदनलाई सुनुवाई गर्दै निवेदनको अन्तिम टुंगो नलागेसम्म वा अर्को निर्वाचित कार्यसमिति गठन नभएसम्मका लागि वर्तमान निर्वाचित कार्यसमितिलाई याथवत शाखाको गतिविधि सञ्चालन गर्न गराउन अदालतले अन्तरीम आदेश दिएको हो ।

अन्तरिम आदेश पश्चात निर्वाचित जिल्ला शाखाले नियमित कार्यको प्रारम्भ गरेको सिन्धुपाल्चोक शाखाको कोभिड सचेतना तथा पूर्व तयारी कार्यक्रमका व्यवसायिक स्वयम सेवक भरतप्रसाद कोइरालाले जानकारी दिए ।