पहिलो चरणको मतदाता नामावली संकलन सुरु

चौतारा । देशभरका सबै स्थानीय तहका केन्द्रबाटै मतदाता नामावली संकलन सुरू गर्ने निर्वाचन आयोगको निर्णय अनुसार जिल्ला निर्वाचन कार्यालय, सिन्धुपाल्चोकले कार्यतालिका सार्वजनिक गरेको छ ।

यसअघि आयोगले ७७ वटै निर्वाचन कार्यालय, ७७ जिल्ला प्रशासन कार्यालय र विभिन्न जिल्लाका ४० वटा इलाका प्रशासन कार्यालयबाट मात्रै मतदाता नामावली संकलन गर्दै आएको थियो । तर, नयाँ प्रावधान अनुसार जुनसुकै स्थानमा बसेकाले पनि नामावलीमा आफ्नो नाम समावेश गर्न सक्ने व्यवस्था मिलाइएको छ ।

मतदाता नामावली संकलनको लागि मंसिर १७ देखि २६ सम्म ५ र मंसिर २८ देखि पुस ८ सम्म ६ वटा केन्द्र तोकिएका छन् । सिन्धुपाल्चोकका निर्वाचन अधिकारी नारायणप्रसाद गौतमले सूचनामार्फत मतदाता नामावलीमा नाम दर्ता चाहिने कागजात र ध्यान दिनुपर्ने कुराहरूसहित सर्वसाधारणलाई सूचित गरिएको जानकारी दिए ।

मतदाता नामावलीमा नाम दर्ता गर्नका लागि सम्वन्धीत पालिकाको केन्द्रमा नागरिकताको प्रमाणपत्रसहित व्यक्ति स्वयम् उपस्थित हुनु पर्ने र बसाइ सरी आएका कोही भए बसाइ सराईको प्रमाणपत्र वा विवहा भइ आएको र सोही स्थानमा दर्त गर्न चाहेमा विवहा दर्ताको प्रमाणप्रत्रसहित उपस्थित हुनु पर्ने अधिकारी गौतमले जानकारी दिए ।

पहिलो चरण अन्तर्गत हेलम्बु, पाँचपोखरी थाङ्पाल, बलेफी, त्रिपुरासुन्दरी गाउँपालिका र बाह्रबीसे नगरपालिकामा सञ्चालन हुने छ भने दोस्रो चरण अन्तर्गत इन्द्रवती, जुगल, लिसंखुपाखर, सुनकोसी, भोटेकोशी गाउँपालिका र मेलम्ची नगरपालिकामा हुने छ । अधिकारी गौतमका अनुसार फोटोसहितको नामावलीमा हालसम्म नमावली दर्ता नभइ छुट भएकाले मात्र नामावली दर्ता गर्न सकिने छ ।