चौतारा अस्पतालमा पिसिआर ल्याव सञ्चालन

चौतारा । सिन्धुपाल्चोकको जिल्ला अस्पताल चौताराबाट कोरोना भाईरस (कोभिड–१९)को पीसीआर परीक्षण सुरु भएको छ ।

बाग्मती प्रदेश सरकारको आर्थिक सहयोगमा पीसीआर परीक्षण प्रयोगशाला स्थापना भएसँगै सिन्धुपाल्चोमै कोरोना भाईरसको परीक्षण सुरु भएको हो । चौतारा अस्पतालमा पीसीआर मेसिन जडान गरी पीसीआर प्रयोगशाला ल्याब सञ्चालनमा ल्याईएको छ । विहिबार बागमती प्रादेशिक प्रयोगशाला धुलिखेलका निर्देशक नारायण कार्कीसहित ३ जनाको प्राविधिक टोलीले पीसीआर मेसिन जडान गरेर नमूना परीक्षण गरेका थिए ।

प्रयोगशालामा १० जनाको स्वाब परीक्षण गर्दा परीक्षण सफल भएको निर्देशक कार्कीले जानकारी दिए । कोभिड– १९ परीक्षण प्रयोगशाला सञ्चालनका लागि ५ जना स्वास्थ्यकर्मीको व्यवस्था गरिएको चौतारा अस्पतालले जनाएको छ । यसअघि कोरोना आशंका गरिएका बिरामीको स्वाब धुलिखेल वा काठमाडौं पठाउनु पर्ने बाध्यता थियो । जिल्लामै पीसीआर मेसिन भएपछि अब पीसीआर परीक्षणका लागि स्वाव संकलन गरि बाहिर पठाउनु पर्ने बाध्यता हटेको छ ।

त्यस्तै गरी चौतारा अस्पतालले अक्सिजन प्लान्ट सञ्चालनमा ल्याएको छ । प्लान्ट सञ्चालनसँगै बिरामीको बेडमै पाइपलाइनबाट अक्सिजन पुर्याईएको छ । प्लान्टले प्रतिघण्टा ८५–९० लिटरसम्म अक्सिजन उत्पादन गर्ने मेडिकल सुपरिटेन्डेन्ट डा. करुणा बज्राचाार्यले बताइन् । उनका अनुसार उत्पादित अक्सिजन पाइपलाइनबाट अस्पतालको कोभिड वार्ड, इर्मर्जेन्सी र अन्य वार्डमा रहेका बेडमा पुर्याईएको छ । अस्पतालमा आफ्नै अक्सिजन प्लान्ट जडान भएपछि अक्सिजन लिनको लागि अन्यत्र जानुपर्ने छुटकारा मिलेको छ ।

‘हामीले चौतारा अस्पतालबाट बिरामीहरुलाई सम्पूर्ण सेवा सुविधा दिने गरी काम गरिरहेका छौं’, चौतारा अस्पताल व्यवस्थापन तथा सञ्चालन समितिका अध्यक्ष इश्वरीप्रसाद श्रेष्ठले भने– ‘अस्पतालको भवन नहुँदासमेत नगरपालिकाले दिएको फिल्ड ट्रेनिङ सेन्टरलाई आईसुलेशन वार्ड र पीसीआर ल्याब स्थापना गरी विरामीको उपचार गरेका थियौं ।’

उनले अस्पताल सञ्चालनमा सहयोग गरेकोमा फिल्ड ट्रेनिङ सेन्टर र चौतारा साँचाचोक नगरपालिकाका प्रमुख अमानसिं तामाङलाई धन्यवाद प्रदान गरे । चीन सरकारको सहयोगमा तत्काल चौतारा अस्पतालको भवन निर्माण गरिने उनले बताए । भवन निर्माण कार्यलाई पूर्णता दिन सबै सरोकारवालाहरुलाई उनले आग्रहसमेत गरे ।