महिला हिंसाबिरुद्ध १० बुँदे प्रतिवद्धता जारी

बराम्ची । १० बुँदे प्रतिवद्धता जारी गर्दै महिला हिंसा बिरुद्धको १६ दिने अभियान समापन गरिएको छ ।

जुगल गाउँपालिकाको महिला तथा बालबालिका शाखाद्वारा आयोजना गरिएको एक कार्यक्रम बीच महिला हिंसाबिरुद्ध १० बुँदे प्रतिवद्धता जारी गरिएको हो । कार्यक्रममा जिल्ला समन्वय समितिका उपप्रमुख बालकुमारी सापकोटा हिंसा सहनु नहुने साथै हिंसा भएको थाहा पाएमा सम्बन्धित निकायलाई जानकारी गराएमा समाजमा हुने हिंसाका घटना निर्मूल हुने भन्दै कार्यक्रमले समाज परिवर्तनमा टेवा पुग्ने कुरा पनि बताईन् ।

सो कार्यक्रममा गाउँपालिका उपाध्यक्ष सृजना तामाङले समाजमा धेरै हिंसाका घटना हुने तर ती घटना बाहिर नआउने हुदा समाजमा अप्रिय घटना बढी घट्ने गरेका बताईन् । समाजमा महिलामाथि हुने अप्रिय घटना घट्न नदिन सबै एकजुट भएर लाग्नु पर्नेमा उनको जोड थियो ।

कार्यक्रममा सहभागीहरुलाई हिंसा सहेर नबस्नु आग्रह गर्दै समस्या परेमा पालिकाको न्यायिक समितिलाई जानकारी गराउन अनुरोध गरेका थिए । सहभागीले ‘म हिंसा गर्दिन, देखेको हिंसामा प्रतिकार गर्छु’ भन्ने प्रतिबद्धता पत्रमा हस्ताक्षर समेत गरेका थिए ।

यस्तो छ १० बुँदे प्रतिवद्धताः

१. महिला विरुद्धको हिंसा अन्त्य गर्नको लागि घरैदेखि सुरु गर्दछौँ ।
२. लैङ्गिक हिंसा विरुद्धको सबै खालको राष्ट्रिय तथा अन्तर्राष्ट्रिय कानुनहरुको पालना गर्दछौँ ।
३. महिलाको मानव अधिकार संरक्षण गर्न एकतावद्ध भएर लाग्दछौँ ।
४. सार्वजनिक वा निजी जीवनमा रहँदा लैङ्गिक आधारमा कसैप्रति शारीरिक, मानसिक, सामाजिक–साँस्कृतिक, राजनीतिक, आर्थिक, यौनिक, भावानात्मक पीडा वा क्षति पुर्याउने कार्य गर्दैनौँ ।
५. लैङ्गिक हिंसा विरुद्ध सदैव बुलन्द आवाज लियर उभिन्छौँँ ।
६. लैङ्गिक हिंसामा परेको पीडितको न्यायमा पहुँचको सुनिश्चितता गर्दै विशेष सुरक्षा र संरक्षणको प्रत्याभूति दिलाउँदछौँ ।
७. लैङ्गिक हिंसाजन्य कार्यहरु गर्ने दोषीलाई कानूनी सजायको भागिदार बनाउन प्रतिवद्ध र क्रियाशिल हन्छौँ ।
८. लैङ्गिक हिंसा उन्मूलनको लागि शिक्षा लिन र दिन तथा चेतना जगाउन प्रतिवद्ध छौँ ।
९. सबैको व्यक्तिगत स्वाभिमानलाई सम्मान गर्दछौँ ।
१०. लैङ्गिक हिंसा रहित सभ्य र समतामूलक समाज निर्माण गर्दछौँ ।