जुगलको आधार शिविरमा ‘फलामे बाटो’ निर्माण

चौतारा । जुगल हिमश्रृङ्खलाको आधार शिविर क्षेत्रको पर्यटन विकासमा टेवा पुर्याउन ‘फलामे बाटो’ निर्माण गरिएको छ ।

सभामुख अग्निप्रसाद सापकोटाको विशेष समन्वयमा पर्यटन विभागबाट विनियोजित रकमबाट जुगल हिमश्रृङ्खला क्षेत्रमा ‘फलामे बाटो’ निर्माण गरिएको हो । सो बाटोको नाम ‘जुगल भिया फराता’ राखिएको छ । नेपालमै पहिलो पटक निर्माण फलामे बाटो निर्माणसँगै जुगल हिमशृङ्खलाको आधार शिविर पुगेपछि जुगलका चुचुराहरु आरोहण गर्न सहज हुने छ ।

सोही शीर्षकको रकमबाट जुगल हिमश्रृङ्खलाको आधार शिविर प्रवेश क्षेत्र नेपेमासालदेखि बुम्बाशेर्बुसम्म तीन हजार सिंडि निर्माण भएको छ । साथै ‘जुगल माउन्टेन हट’ लगायतका जुलग हिमशृङ्खलाको आधार शिविर क्षेत्रमा पुग्न, बसोबास एवं अन्य सुविधाका लागि काम भइरहेको र निकट भविष्यमा सम्पन्न हुने फलामे बाटो निर्माणको टिम लिडर तुलसिं गुरुङले बताए ।

२०७५ चैतको अन्त्यमा सिन्धुपाल्चोक जुगल गाउँपालिका– ३ गुम्बाको जुगल हिमशृङ्खलामा पर्ने छ हजार १५१ मिटर उचाइको ग्याल्जेन चुचुरोको प्रथम पटक सफल आरोहण भएको थियो । जुगल हिमशृङ्खलामा ग्याल्जेन पिकसहित ११ वटा चुचुरा छन् । सबै चुचुरामा पुग्न नेपेमासाल हुँदै आधार शिविर पुग्नु पर्ने भएकोले सो क्षेत्रको पुर्वार्वाधार निर्माणमा सभामुख सापकोटाको विशेष चासो दिएका थिए

सिन्धुपाल्चोकको बलेफी गाउँपालिकाको केन्द्र बलेफी बजारबाट ब्रम्हायणी करिडोरको बाटो हुँदै नौविसे, जलविरे, कात्तिके, पाँगर्पु, बोल्दे, गुम्बा, अम्बाखर्क, तेम्बाथान र अन्तिम बस्ती दिपु हुँदै नेपेमासाल पुग्न सकिन्छ । नेपेमासालबाट माथि जान हाल सिंडी निर्माण गरिएको हो । सो क्षेत्रबाट एक दिनमा जुगल हिमशृङ्खलाको आधार शिविर पुग्न सकिन्छ ।