गायक लोप्चनले पाए स्टार म्युजिक अवार्ड

चौतारा । संगीतिक कार्यक्रमको सिलसिलामा दुबई पुगेका गायक आस्मान लोप्चनले नेपाल फर्कने बितिकै अवार्ड जितेका छन् ।

वरदुवईमा नसा क्लबको आयोजनामा भएको नसा सेलो साँझमा आफ्नो प्रस्तुतीको लागि गायक लोप्चन डिसेम्बर २ मा दुवई पुगेका थिए । उनले सो साँझमा एक दर्जन भन्दा बढी गीत गएर मनोरञ्जन दिएका थिए । एक साताको दुबई यात्रापछी नेपाल फर्किएका लोप्चनले स्टार म्युजिक एण्ड फिल्म अवार्ड २०२१ प्राप्त गरेका हुन् ।

लोप्चनकै उत्कृष्ट तामाङ सेलो ‘बल्ल पो तामाङको हुल उठ्यो’ बोलको गीत बाट वर्षकै उत्कृष्ट पुरुष सेलो गायकको अवार्ड प्राप्त गरेका हुन् । ‘यो अवार्ड प्राप्त गरेपछि थप जिम्मेवारी प्राप्त भएको महसुस गरेको छु’, अवार्ड प्राप्त गरेलगतै प्रतिक्रिया दिदै लोप्चनले भने– ‘अब मेरो सांगीतिक यात्रालाई थप पारिकृत बनाउँदै लैजाने छु ।’ उनको एक दर्जन भन्दा बढी गीतहरु बजारमा आएका छन् ।

सिन्धुपाल्चोकको चौतारा सँगाचोकगढी नगरपालिका– ३ भुवागाँउमा जन्मिएका लोप्चनले खान्दोके सोलो भाका प्रवद्र्धनमा विशेष येगदान दिइरहेका छन् । २०७१ सालदेखि औपचारिक रुपमा गीत रेकड गराएका लोप्चनको ‘आस्याङ्की छोरी’, ‘हिमाल पारीको गाउँ’, ‘बल्ल पो तामाङको हुल उठ्यो’, ‘वाला वाला रिवन’, ‘लेकमा जाँदा’, ‘आगो त बाल्ने सलाईको’, ‘वेसी घट्टरी’ लगयत गीत चर्चित छन् ।

स्कुले दिनहरुमा नृत्य गर्दै रेडियोमा कार्यक्रम प्रस्तोताको रूपमा काम गर्दै गीत संगीतमा लागेका लोप्चनले सिन्धुपाल्चोकको रेडियो सिन्धु १०५ मेघाहर्जमा जिल्लाकै पहिलो तामाङ भाषाकै पहिलो समाचार वाचकको भूमिका समेत निर्वाह गरिसकेका छन् । स्टेज प्रस्तुतीमा माहिर लोप्चन सेलो समुदायको व्यस्त एवम् प्रिय कलाकारको रुपमा लिइन्छ । गायनमात्र नभई उनले मोडलिङ, निर्देशन र सम्पादन समेत गर्दै आएका छन् । उनले केहि गीतको भीडियो निर्देशन गर्नुको साथै सम्पादन र मोडलिङ गरेका छन् ।

लोप्चन नेपाल तामाङ संस्कृति घेदुङ सिन्धुपाल्चोकका अध्यक्ष, नेपाल तामाङ कलाकार संघको कार्य समिति सदस्य, नेपाल कला साहित्य प्रतिष्ठानको अध्यक्ष रही सामाजिक कार्यमा सक्रिय लोप्चन गीत संगीतको प्रवद्धनमा सधैं लागि रहने बताउँछन् ।