अमेरिकाको ब्रानफोर्ड टाउन आरटिएम श्रेष्ठलाई चौतारामा अभिनन्दन र सम्मान

चौतारा । सामाजिक अभियान्ता, सिन्धुपाल्चोकका गौरव एवम् अमेरिकाको कनेक्टिकट राज्यको ब्रानफोर्ड टाउन आरटिएम रामचन्द्र श्रेष्ठलाई अभिनन्दन र सम्मान गरिएको छ ।

चौतारा बहुमुखी क्याम्पसले सोमबार बिहान श्रेष्ठलाई अभिनन्दन गरेको हो । क्याम्पसको सभाहलमा भएको सो कार्यक्रमकै बीच सिन्धु मिलन केन्द्रले पनि श्रेष्ठलाई सम्मान गरेको थियो । सो कार्यक्रममा सिन्धु मिलन केन्द्रका अध्यक्ष ई. गम्भीरलाल श्रेष्ठ, राजनीतिज्ञ सोम सापकोटा, सीता थापा, क्याम्पस सम्बद्ध व्यक्तित्वहरु, सुरक्षकर्मी, पत्रकार एवम् साहित्यकार, विद्यार्थीरुको बाक्लो उपस्थिति थियो ।

त्यस्तै जिल्लामा विभिन्न गतिविधिमा संलग्न १३ वटा संस्थाले श्रेष्ठलाई आईतबार नेपाल पत्रकार महासंघ सिन्धु शाखाको सभाहलमा अभिनन्दन गरेको थियो । नेपाल पत्रकार महासंघ सिन्धुपाल्चोक, चौतारा साँगाचोकगढी नगरपालिका, ५ नम्बर वडा कार्यालय, दुःखी प्रकाशन, शब्द सारथि, श्री कृष्ण रत्न गंगा माध्यामिक विद्यालय, सिन्धु कला मन्दिर, सिन्धु नेवाः खेल, लायन्स क्लव अफ काठमाडौ सिन्धु चौतारा सिटी, जनहित ग्रमीण सेवा समिति, सर्वपक्ष दैनिक, क्यान सिन्धुपाल्चोक र नेपाल रेडक्रस सोसाईटी सिन्धुपाल्चोकले संयुक्त रुपमा श्रेष्ठलाई अभिनन्दन गरेको थिए ।

सिन्धुपाल्चोक चौतारा घर भई हाल कनेक्टिकट राज्यको ब्रानफोर्ड नगरमा बस्दै आएका श्रेष्ठ सफल व्यवसायी पनि हुन् । १९९६ मा अमेरिका पुगेका श्रेष्ठ २० वर्षदेखि उक्त शहरमा व्यवसाय गर्दै आएका छन् । गएको सेप्टेम्बर २४ मा अमेरिकाको कनेक्टिकट राज्यको ब्रानफोर्ड टाउन आरटिएममा निर्वाचित भएका श्रेष्ठ नेपालमा रहँदा विभिन्न सामाजिक, शैक्षिक र राजनीतिक गतिविधिमा संलग्न थिए । श्रेष्ठ अमेरिकाको इतिहासमा यसरी मूलधारमा पुग्ने नेपाली मूलका पाँचौ व्यक्ति हुन् ।

कार्यक्रममा चौतारा साँगाचोकगढी नगरपालिकाका प्रमुख अमानसिं तामाङले कनेक्टिकट राज्य र चौतारा साँगाचोकगढी नगरपालिकाबीच भागिन सम्बन्ध कायम गर्न प्रस्ताव गर्दै त्यहाँको विकास नमूनालाई सिन्धुपाल्चोकमा प्रयोग गर्नुपर्नेमा जोड दिए । ‘हामीले त्यहाँकोजस्तो विकास प्रकृया लागु गर्नु आवश्यक छ’, तामाङले भने– ‘त्यसको पुलको रुपमा चौतारा साँगाचोकगढी नगरपालिका कनेक्टिकट राज्यसँग भगिनी सम्बन्धको लागि प्रस्ताव गर्दछ ।’

अभिनन्दन पछि बोल्दै श्रेष्ठले आफूलाई जन्मभूमिले दिएको सम्मानले थप केहि गर्नुपर्ने हौसला र प्रेरणा दिएको बताए । ‘म यहि जन्मे हुर्केको मान्छे हुँ, आज यहाँहरुले गर्नुभएको सम्मानले मलाई प्रेरणा र हौसला दिएको छ’, श्रेष्ठले भने– ‘यहाँहरुको सम्मानलाई सार्थक पु¥याउन सक्छु कि सक्दिन भन्ने चिन्ता पनि थपिएको छ ।’ आफूले सिन्धुबासीलाई सदैव सकेको सहयोग गर्ने बताउँदै श्रेष्ठले सम्मानप्रति आयोजकहरुलाई धन्यवाद प्रदान गरे ।

कार्यक्रममा पूर्व सांसद् कृष्णराज श्रेष्ठ, चौतारा क्याम्पसका प्रमुख नगेन्द्र दंगाल, प्राचार्य यज्ञ दंगाल, सिन्धु नेवाः खलका अध्यक्ष माधवलाल कर्मचार्य, राजनैतिक ब्यक्तिहरु नरमान श्रेष्ठ, ईन्द्रलोचन धिताल, लगायतले श्रेष्ठको बारेमा चर्चा गरेका थिए । नेपाल पत्रकार महासंघ सिन्धु शाखाका अध्यक्ष जीवन श्रेष्ठको सभापतित्वमा सो अभिनन्दन कार्यक्रम गरिएको थियो ।