शिक्षा नीति परिस्कृत गर्न जरुरीः पूर्व मन्त्री दुलाल

चौतारा । बागमती प्रदेशका पूर्व सामाजिक विकास मन्त्री तथा नेकपा (माओवादी केन्द्र)का केन्द्रीय सदस्य युवराज दुलालले शिक्षा नीतिलाई परिस्कृत गर्न जरुरी रहेको बताएका छन् ।

सिन्धुपाल्चोक चौतारा साँगाचोकगढी नगरपालिका– ५ मा रहेको श्रीकृष्ण रत्नगंगा माध्यमिक विद्यालयको ७५औं वार्षिक उत्सव, ५७औं अभिभावक तथा पूर्व विद्यार्थी समाजको आठौँ भेलालाई सम्बोधन गर्दै दुलालले शिक्षामार्फत समाजलाई समृद्ध बनाउने हो भने सबैभन्दा पहिले शिक्षा नीति परिस्कृत गर्नुपर्नेमा जोड दिए ।

‘हाम्रो अहिलेको शिक्षा नीतिले वेरोजगार मात्रै उत्पन्न गर्ने गरेको छ’, उनले भने– ‘शिक्षालाई विकाससँग जोडेर मूलुकलाई समृद्ध बनाउनु अहिलेको आवश्यकता हो ।’ हरेक क्षेत्रको विकासको लागि शैक्षिक क्षेत्र महत्वपूर्ण कडि भएको बताउँदै शैक्षिक सुधारका लागि जिल्लामा महत्वपूर्ण काम भएको बताए । उनले त्यसमा सहकार्य गर्नको लागि आफूहरू निरन्तर लागि परेको जनाए ।

विद्यालयमा विद्यार्थी संख्या बढी हुन समस्या भनई अवसर भएको बताउँदै श्रीकृष्ण रत्नगंगाले त्यो अवसरलाई ग्रहण गर्नुपर्नेमा जोड दिए । ‘यस विद्यालयमा विधार्थी संख्या धेरै छ, त्यसलाई तपाईंहरुले अवसरको रुपमा सदुपयोग गर्नुस्’, दुलालले भने । विकासले समृद्ध चौतारा बनाउन शिक्षा, स्वास्थ्य, पूर्वधारलाई पहिलो प्रथामिकतामा राखिएको उनले बताए ।

वार्षिक उत्सव कार्यक्रममा विद्यालयका प्रधानाध्यापक धुब्रलाल श्रेष्ठले आर्थिक वर्ष २०७७/७८ को वार्षिक शैक्षिक तथा आर्थिक प्रगति प्रतिवेदन प्रस्तुत गरेका थिए । उनले आगामी दिन हरुमा भावी योजना तथा रणनीति प्रस्तुत गर्दै विद्यालयलाई जिल्लाका एक नमूना विद्यालयको रुपमा स्थापित गर्ने बताए ।

कार्यक्रमको बीच विद्यालयको पूर्व विद्यार्थी एवम् सेनाका अवकाश प्राप्त जर्नेल डा. पूर्णबहादुर सिलवालले विद्यालय प्राङ्गणमा व्यक्तिगत खर्चबाट निर्माण गरेको सरस्वतीको मन्दिर विद्यालयलाई हस्तान्तरण गरिएको थियो । त्यस्तै विद्यालयले हरेक वर्ष प्रकाशन गर्दै आएको स्मारिका नवकिरणको सार्वजनिकीकरण समेत गरिएको थियो ।

वार्षिक उत्सवको अवसरमा विद्यालयले चौतारा साँगाचोकगढी नगरपालिकाका प्रमुख अमानसिं तामाङ, नेपाल पत्रकार महासंघ सिन्धुपाल्चोकका अध्यक्ष जीवन श्रेष्ठ, सेनाको पूर्व उपरथी डा. पूर्णबहादुर सिलवाल, शब्द–सारथिका अध्यक्ष अमित घिमिरे, अभिभावक श्याम सापकोटालगायत सो विद्यालयमा अध्ययन गरेर विभिन्न क्षेत्रमा योगदान पुर्याएकाहरुलाई सम्मान गरेको थियो ।

कार्यक्रममा राष्ट्रपति रनिङ शिल्ड नगर स्तरिय र जिल्लामा सहभागी भई विभिन्न विधामा पदक बिजेता, उपविजेता खेलाडीहरुलाई पनि सम्मान गरिएको थियो । विद्यालयको नर्सरी देखि कक्षा १२ सम्माका उत्कृष्ट ३ जना विधार्थीलाई पुरस्कार प्रदान गरिएको थियो । त्यसैगरी उत्कृष्ट शिक्षक शिक्षिकाहरुलाई पनि सम्मान समेत गरिएको थियो ।

विद्यालय व्यवस्थापन समितिका संयोजक तथा वडा नं ५ का वडा अध्यक्ष नरमान श्रेष्ठको अध्यक्षतामा पूर्व सांसदद्वय कृष्णराज श्रेष्ठ र सुभाष कर्माचार्य, नगरप्रमुख अमानसिं तामाङ, विद्यार्थी अभिभावक लगायतको उपस्थितिमा कार्यक्रम गरिएको थियो ।