राईले उचाले मेयर कप म्याराथनको उपाधी

चौतारा । सिन्धुपाल्चोकको चौतारामा पहिलोपटक आयोजना भएको चौतारा साँगाचोकगढी नगरपालिका मेयर कप खुल्ला हाफ म्याराथनको उपाधी नेपाल आर्मीका गजेन्द्र राईले प्रथम उपाधी प्राप्त गरेका छन् ।

निर्धारित २१ किलोमिटर दुरी १ घण्टा ३६ मिनेट १२ सेकेण्डमा पूरा गर्दै राईले उपाधि पाएका हुन् । उपाधीसँगै उनले नगद ४४ हजार ४ सय ४४ रुपैयाँ प्राप्त गरे । सिन्धुपाल्चोकको ऐतिहासिक क्षेत्र साँगाचोकगढीदेखि सुरु भई मानेडाँडा, जल्किने, ईर्खु, चौतारा हुँदै ब्याङ्चेपानी पुगेर गौरती भिमसेन मन्दिर परिक्रमा गरी टुडिखेलमा आएपछि दुरी पूरा भएको थियो ।

दोश्रो र तेश्रो स्थानमा श्रीकास राई र नवराज साउदले क्रमसः १ घण्टा ३६ मिनेट २४ सेकेण्ड र १ घण्टा ३८ मिनेट ११ सेकेण्डमा दौड पूरा गरे । दोस्रो हुनेले २२ हजार २ सय २२, तेस्रो हुनेले ११ हजार १ सय ११ प्राप्त गरेका छन् । चौथो स्थान १ घण्टा ४१ मिनेट १९ सेकेण्डमा दौड पूरा गर्दै रामजी बस्नेतले ५ हजार ५ सय ५५ रुपैया हात पारेका छन् ।

यसैगरी महिला तर्फ आर्मीकी विश्व रुपा शुढा पहिलो भईन् । उनले १ घण्टा ५६ मिनेट ०५ सेकेण्डमा दौड पूरा गरिन् । उपाधीसँगै उनले नगद ४४ हजार ४ सय ४४ रुपैयाँ प्राप्त गरिन् । यस्तै महिलातर्फ दोस्रोमा हुमी बुढामगर र तेश्रो स्थान निर्मला राई भईन् । उनीहरुले क्रमशः २ घण्टा १३ मिनेट १७ सेकेण्ड र २ घण्टा २० मिनेट ०८ सेकेण्डमा दौड पूरा गरे ।

यस्तै ४०–५९ वर्ष सम्मको भेट्रान्स महिला तर्फ राधा श्रेष्ठ प्रथम, उमाकुमारी दंगाल गौतम दोश्रो र सुष्मा पाण्डे तेश्रो भइन् । ४०–५९ वर्षसम्मको भेट्रान्स पुरुष तर्फ भीमबहादुर गुरुङ प्रथम, धर्म महर्जन दोश्रो र दामोदर बुढामगर तेश्रो भए । यसैगरी सुपर भेट्रान्स तर्फ रामकृष्ण महर्जन पहिलो, पुष्पलाल श्रेष्ठ दोश्रो तथा गोविन्द सिलवाल तेश्रो भएका छन् ।

सिन्धुपाल्चोक जिल्ला तर्फ पिपलडाँडाका शिव कुँवर पहिलो बने । प्रतियोगितामा सहभागि हुन सिन्धुपाल्चोकसंगै काठमाडौ, ललितपुर, भक्तपुर, गुल्मी, स्याङ्जा, भोजपुर, वर्दिया, कालिकोट, प्युठान लगायत ३० जिल्लाका १ सय ७० खेलाडी चौतारा साँगाचोकगढी नगरपालिकामा आएका थिए ।

कार्यक्रममा किर्तिमानी धावक बैकुन्ठ मानन्धर समेत सहभागि बनेका थिए । नयाँ पुस्ताका खेलाडीको हौसला र आफ्नो स्वास्थ्यको लागि प्रतियोगितामा सहभागि भएको मानन्धरको भनाई थियो । बैकुण्ठ मानन्धरले सन् १९८७ मा भारतको कोलकातामा ४२ किमि दूरी दुई घण्टा १५ मिनेट तीन सेकेन्डमा पूरा गरेर दक्षिण एशियाली कीर्तिमान बनाएका थिए ।

प्रतियोगिताको उद्घाटन साँगाचोककोगढीबाट बाग्मती प्रदेशका पूर्व सामाजिक विकास मन्त्री युवराज दुलालले गरेका थिए । चौतारा साँगाचोकगढी नगर खेलकुद विकास समितिको आयोजनामा भएको कार्यक्रमलाई क्षमादेवी ग्रुपले सहयोग गरेको थियो भने ब्ल्याक हर्स सुजले खेलाडीहरुको लागि जर्सीको व्यवस्था गरिदिएको थियो ।