सिन्धुपाल्चोकमा दैनिक बढ्दै कोभिड संक्रमित

चौतारा । सिन्धुपाल्चोकमा कोरोना संक्रमण फेरि बढ्न थालेको छ । संक्रमित हुनेहरुको संख्या दैनिक रुपमा बढ्न थालेको स्वास्थ्य कार्यालय सिन्धुपाल्चोकले जनाएको छ ।

शुक्रबार सिन्धुपाल्चोकभर ५ जनामा संक्रमण पुष्टि भएको छ । चौतारा साँगाचोकगढी नगरपालिकाका ४ जना पुरुष र पाँचपोखरी थाङ्पाल गाउँपालिकामा एक जना महिलामा कोरोना संक्रमण देखिएको हो । बिहीबार ५ महिला र ४ पुरुष गरी ९ जनामा संक्रमण देखिएको थियो ।

संक्रमण बढेपछि जिल्ला कोभिड व्यवस्थापन समिति सिन्धुपाल्चोकले बैठक बसी एकै स्थानमा एकै पटक २५ जनाभन्दा बढी भेला हुन नपाउने व्यवस्था गरेको छ । संक्रमणको सम्भावनालाई मध्यनजर गर्दै विद्यालय सञ्चालन, पठन पाठनका लागि यस अगाडि शिक्षा मन्त्रालयबाट जारी सूचना बमोजिम गर्न गराउन सबै स्थानीय तहलाई अनुरोध गरेको छ ।

बैठकले संक्रमण बृद्धिदर उच्च रहेको निष्कर्ष निकालेको छ । बैठकले जिल्लाबासीहरुमा जनस्वास्थ्य मापदण्डको पूर्ण पालना गर्न, भिडभाडमा नजान, भौतिक दूरी कायम गर्न, मास्कको प्रयोग गर्न तथा बाह्य सम्पर्कमा आएपछि नियमित हात धुने गर्न आह्वान गरेको छ ।

समुदायका जोखिम क्षेत्रहरु पहिचान गरी एन्टिजिन किटबाट परीक्षण गर्ने, परीक्षणको दायरा बढाउने निर्णय सो समितिको बैठकले गरेको छ । पहिचान भएका कोभिड–१९ केसहरुको उचित व्यवस्थापन गर्दै जाने, आवश्यक समन्वय बढाउने निर्णय गरेको छ । खोप लगाउन छुटेका लक्षित वर्गका व्यक्तिहरुलाई कोभिड–१९ विरुद्वको खोप लगाउन प्रोत्साहन गर्ने र लगाउने । व्यवस्थापन थप प्रभावकारी बनाउँदै जाने निर्णय गरेको छ ।

घरमै आइसोलेसनमा रहेका व्यक्तिहरुको उचित फलोअप एवं मापदण्ड पालनामा निगरानी बढाउने निर्णय गरेको छ । सार्वजनिक सवारीबाट जिल्ला प्रवेश गर्ने नाकाहरुमा यात्रुहरुले मास्क लगाए नलगाएको चेकजाँच गरी मास्क लगाउन अनिवार्य गराउने, स्थानीय तहसँग समन्वय गरी सहायता कक्ष सञ्चालन गर्ने, स्वास्थ्य केन्द्रहरु तथा आइसोलेसन सेन्टरहरुमा आवश्यक पूर्वतयारी गर्ने निर्णय समेत बैठकले गरेको छ ।