हेलम्बु–मेलम्ची क्षेत्रमा तत्काल ५ वटा पुल बनाउने सहमति

मेलम्ची । गएको असार १ र साउन १९ गते गएको भेमथाङ पहिरोका कारण क्षति पुगेको हेलम्बु–मेलम्ची क्षेत्रको ५ वटा पुल तत्काल बनाउने सहमति भएको छ ।

पूर्वमन्त्री एवम् संघीय सांसद् शेरबहादुर तामाङको अध्यक्षतामा बसेको बाढीबाट क्षति भएका संरचनाहरुको पुनर्निर्माण सम्बन्धि सोमबार सडक विभाग ललितपुरमा बैठक बसेको हो । बैठकले मेलम्ची बजारमा रहेको पाँचपोखरी गाउँपालिका, इन्द्रावती गाउँपालिका र चौतारा साँगाचोकगढी नगरपालिका जोड्ने पक्की पुल, मेलम्ची फट्टे मोटरपुल र मेलम्ची हेलम्बु सडक खण्डको थप ३ वटा पक्की पुलहरु तत्काल निर्माण गर्ने जनाएको छ ।

बैठकमा सडक विभागका महानिर्देशक शिवहरि सापकोटाले स्थानीय सरकारले चासो दिने हो भने पुल निर्माण तत्काल सुरु हुने बताए । ‘झण्डै ६ महिना बाढीका कारण सास्ती बेहोरिरहेका त्यहाँका स्थानीयको पीडामा मल्हम लगाउन स्थानीय सरकार सक्रिय हुन जरुरी छ’, सापकोटाले भने– ‘स्थानीय सरकारले चासो दिए हामी तुरुन्तै काम सुरु गर्न तयार छौं ।’ उनले सडक विभागको तर्फबाट गर्नु पर्ने काममा कुनै ढिलाई नगर्ने बताए ।

सडक विभागको पुल महाशाखा प्रमुख उमेश बिन्दु श्रेष्ठले छिटो प्रकृयाबाट पूल र सडक निर्माणको काम सुरु गर्नुपर्ने आवश्यकता जनाए । बैठकमा मेलम्ची नगरपालिकाका प्रमुख डम्बर आर्याल, इन्द्रावति गाउँपालिका अध्यक्ष वंशलाल तामाङले सडक र पुल पुनर्निर्माणमा ढिलाई भएकोमा चिन्ता जनाएका थिए । त्यस्तै पाँचपोखरी थाङ्पाल गाउँपालिका अध्यक्ष टासी लामाले मेलम्ची भोताङ सडक वर्षायाम अगाडि नै पुनर्निर्माण गरिसक्नुपर्नेमा जोड दिएका थिए ।

बैठकले मेलम्ची–हेलम्बु सडक, मेलम्ची–भोताङ सडकको तत्काल पुनर्निर्माण गर्न र बाहुनेपाटीको पुललाई तत्काल कार्य सम्पन्न गर्न निर्देशन दिने निर्णय गरेको जिल्ला समन्वय समिति सिन्धुपाल्चोकका प्रमुख कृष्णगोपाल तामाङले जानकारी दिए ।

बैठकमा सडक डिभिजन कार्यालय दोलखाका प्रमुख अर्जुन सुवाल, मेलम्ची नगरपालिकाकी उपप्रमुख भगवति नेपाल, मेलम्ची नगरपालिकाका प्रमुख प्रशासकीय अधिकृत अमृतकुमार धिताल, ईन्जिनियर जितबहादुर कार्कीलगायतले आगामी जेठ अगाडिनै पुल र सडक सूचारु गर्नुपर्नेमा जोड दिएका थिए ।

बाढीले हेलम्बु–मेलम्ची क्षेत्रका पक्की पुल, झोलुङ्गे पुल, सडक, बसपार्क, सार्वजनिक भवन, खानेपानी, विद्यालय भवन, सिँचाइ कुलो लगायतका पूर्वाधारमा क्षति पुर्याएको थियो ।