समयसीमाभित्रै काम सम्पन्न गर्न सभामुख सापकोटाको निर्देशन

बलेफी । सभामुख अग्निप्रसाद सापकोटाले ब्रम्हायणी करिडोरको लाइफलाईनका रुपमा रहेको बलेफी, जलविरे, कात्तिके, तेम्बाथान सडकको निर्माण काम प्रतिवद्धता अनुसार समयमै सम्पन्न गर्न संबद्ध पक्षको ध्यानाकर्षण गराएका छन् ।

मंगलबार गृह जिल्ला सिन्धुपाल्चोक आएका सापकोटाले सो सडकको बलेफी नौविसे सडक खण्ड अनुगमन गरेका थिए । अनुगमनको क्रममा सभामुख सापकोटाले सडक निर्माणको जिम्मा लिएको पक्षले आफ्नो प्रतिवद्धता पूरा गर्न र समयमै काम सम्पन्न ध्यानाकर्षण गराएका हुन् । उनले सम्बद्ध सबै पक्षलाई जिम्मेवारी र प्रतिवद्धता अनुसार नजिता आउने गरी काम गर्न निर्देशन दिए ।

सहायक राष्ट्रिय राजमार्गका रुपमा सूचिकृत बलेफी जलविरे कात्तिके तेम्बाथान सडकको बलेफी देखि साँडे तीन किलोमिटर बाटो स्तरोन्नतिको काम भइरहेको छ । निर्माण कार्यको अवलोकनका लागि प्रमुख जिल्ला अधिकारी बेदनिधि खनाल, सडक डिभिजन कार्यालय चरिकोटका प्रमुख अर्जुन सुवाल, बलेफी गाउँ पालिकाका अध्यक्ष केदार क्षेत्री, उपाध्यक्ष कमला कायस्थसहित पुगेकासभामुख सापकोटाले सडक निर्माणको जिम्मा लिएको अन कबिर जेभीका जिम्मेवार अधिकारीहरुलाई सो सडकको महत्व बुझेर काम गर्न सुझाब दिए ।

अनुगमनमा सम्बद्ध सबै पक्ष उपस्थित हुनु राम्रो भएको बताउँदै उनले जुगल हिमालको फेदिसम्म पुग्ने सो बाटो र जुगल हिमाल आरोहणलाई दिइएको महत्वबारे स्मरण गराएका थिए । केन्द्रमा गर्ने पहल कदमी आफूले गर्ने प्रतिवद्धता व्यक्त गर्दै सापकोटाले आ–आफ्नो जिम्मेवारी बहन गर्न सबैको ध्यानाकर्षण गराएका थिए ।

बलेफी गाउँपालिकाका अध्यक्ष क्षेत्रीले बाटो निर्माणका सम्बन्धमा स्थानीय रुपमा आउने समस्या समाधानका प्रतिवद्धता व्यक्त गर्दै आइपर्न सक्ने अवान्छित गतिविधि रोक्न स्थानिय प्रशासनले पहल कदमी लिने भन्दै सभामुख सापकोटाले अनुगमन र गुणस्तरयुक्त निर्माणका लागि सडक डिभिजन कार्यालयले थप पहल गर्नु पर्ने बताए ।