सांसद कर्मचार्यसहित एमाले नेताहरु एकीकृत समाजवादीमा प्रवेश

काठमाण्डौ । नेकपा (एमाले) बागमती प्रदेश कमिटीका सचिवालय सदस्य तथा पूर्व सांसद सुवास कर्माचार्यको नेतृत्वमा आज (बुधबार) सिन्धुपाल्चोकका एमाले नेता कार्यकर्ता नेकपा (एकीकृत समाजबादी) मा प्रवेश गरेका छन् ।

काठमाडौंमा आयोजित कार्यक्रममा कर्माचार्यसहितका नेता कार्यकर्तालाई एकीकृत समाजवादीका अध्यक्ष माधवकुमार नेपालले पार्टी प्रवेश गराए । पार्टी प्रवेश गर्नेहरुमा एमाले नेता यज्ञ सापकोटा, इश्वरी श्रेष्ठ, धुर्वराज गिरी, सीता थापा, फइन्द्र तामाङ, दिपक नेपाल, रवीन्द्र शर्मा, बिष्णुलाल श्रेष्ठ, विजय ढुङ्गाना, हेमेश तामाङ, भरत थापा लगाएत रहेका छन् ।

कर्माचार्यले पार्टी प्रवेश कार्यक्रममा अध्यक्ष केपी शर्मा ओली सच्चिन्छन् कि भन्ने आशाले एमालेमा बसे पनि त्यो सम्भव नहुने देखेपछि माधवकुमार नेपाललाई नै नेता मानेर आएको बताए । ‘अब एमालेभित्र बसेर पार्टीलाई सच्याउने अवस्था रहेन, धुजाधुजा भएको कम्युनिष्ट आन्दोलन उठाउने अवस्था रहेन,’ उनले प्रश्न गरे– ‘केपी ओली र उनका गलत कुराको साक्षी बसेर आत्मसमर्पण गरेर निरीह भएर त्यो पार्टीभित्र परिवर्तनको सपना देख्ने कि गलत कुराविरुद्ध विद्रोह गर्ने ?’

२०५६ देखि २०६६ सालसम्म नेकपा एमालेको सिन्धुपाल्चोक जिल्ला सचिव रहेका कर्माचार्य २०५६ सालमा प्रतिनिधिसभा सदस्यमा निर्वाचित भएका थिए । तत्कालिन नेकपा एमालेमा माधवकुमार नेपाल समूहमा रहेका उनी नेता नेपालले पार्टी विभाजन गरे पनि एमालेमै बसेका थिए ।