सरकार जनताको सुरक्षामा प्रतिबद्धः गृहमन्त्री

हेलम्बु । गृहमन्त्री बालकृष्ण खाँणले जनताको सुरक्षामा सरकार प्रतिबद्द रहेको बताएका छन् ।

शनिबार हेलम्बु चनौटेको मेलम्ची खोलामा निर्माण भएको बेलिब्रिजको उद्घाटन गर्दै उनले बाढी प्रभावितको लागि सरकारले काम गरिरहेको र आगामी दिनमा थप कार्यक्रम ल्याउने बताए । गएको असार १ र साउन १६ गते मेलम्ची खोलामा आएको बाढीले चनौटेबजारस्थित रातोपुल बगाएको थियो ।

गृहमन्त्री बालकृष्ण खाँडले राजधानीबासीको खानेपानी समस्या समाधानको लागि मेलम्चीको पानी दिएर सिन्धुबासिले गुन लगाएको भन्दै धन्यबाद ब्यक्त गरे । मेलम्ची लगायत प्राकृतिक बिपत्तिले क्षति पुगेका अन्य ठाउँहरुमा समेत विकास निर्माण र पुर्नस्थापनाको लागि सरकार लागि परेको दावि गरे ।

कार्यक्रममा हेलम्बु गाउँपालिकाका अध्यक्ष निमा ग्यालजेन शेर्पाले पुल निर्माणले स्थानीयलाई आवतजावतमा सहज भएतापनि बाढी प्रभावितहरुको स्थायी आवास पुर्ननिर्माण र बस्ती संरक्षणमा सरकारको ध्यान नपुगेको बताए । बाढी प्रभावितको लागि गएको सरकारले दिएको २ करोड ५० लाख रुपैयाँ चेकको रकम समेत हालसम्म पनि पाउन नसकेको भन्दै दुःख व्यक्त गरे ।

विपद् जोखिम न्यूनीकरण तथा व्यवस्थापन राष्ट्रिय परिषद्ले कात्तिक ४ गते चनौटे र भिरखर्क जोड्ने पुल नेपाली सेनालाई निर्माण गर्ने जिम्मेवारी दिएको थियो । करिब नौ सातामा तयार गरिएको पुल आजै सडक विभागलाई हस्तान्तरण गरिएको छ ।

४८ दशमलब ७७ मिटर लम्बाइ र ४ दशमलब २ मिटर चौडाइ रहेको उक्त पुलको भारवहन क्षमता २४ टन रहेको छ । बाढी आएर पुल बगाएपछि खोला वारपार गर्न निकै कष्ट बेहोर्दै आएका हेलम्बुवासीलाई नयाँ पुल निर्माणपछि अत्यावश्यक खाद्य सामग्री ओसारपसार र बिरामी हुँदाका बखत उपचारका लागि काठमाडौँ लगायतका स्थानमा जान सजिलो भएको छ । हेलम्बु गाउँपालिका २ र ७ जोड्ने सो पुल नेपाली सेनाले बनाएको हो ।