चौतारामा ५१ जनाले गरे रक्तदान

चौतारा । विश्वभर महामारीको रुपमा फैलिएको कोभिड– १९ को विषम परिस्थितिमा रगतको अभाव कम हुन नदिन सिन्धुपाल्चोकको चौतारामा रक्तदान कार्यक्रम गरिएको छ ।

कार्यक्रममा ५१ जनाले रक्तदान गरेका छन् । रक्तदानमा स्थानीयवासी, युवा, समाजसेवी, बुद्धिजीवी, सञ्चारकर्मीलगायत उपस्थित रहेका आयोजक संस्था नेपाल रेडक्रस सोसाईटी चौतारा उपशाखाका सभापति चन्द्रप्रसाद सापकोटाले जानकारी दिए । कोरोना संक्रमणको जोखिमलाई मध्यनजर गर्दै सामाजिक दुरी कायम गरी रक्तदान गरिएको उनको भनाई थियो ।

सामाजिक उत्तरदायित्व वहन गर्दै नेपाल रेडक्रस सोसाईटी चौतारा उपशाखाको आयोजना र बैंक इन्स्योरेन्स माईक्रोफाईनान्स क्लब चौतारा, लाईन्स क्लब अफ काठमाण्डौ चौतारा सिटी र लाईन्स क्लब अफ काठमाण्डौ सिन्धु चौतारा सिटीको सहआयोजनामा शुक्रबार रक्तदान कार्यक्रम आयोजना गरिएको थियो ।

चौतारा साँगाचोकगढी नगरपालिकाका प्रमुख अमानसिं तामाङले रक्तदान कार्यक्रमको उद्घाटन गरेका थिए ।