माझी समुदायले गरे कोशी पूजा

मेलम्ची । खोलालाई भगवानको रूपमा सामूहिक पूजा गर्दै माझी समुदायले मंगलबार धुमधामका साथ मौलिक पर्व ‘लदी’ अर्थात् ‘कोशी पर्व’ मनाएका छन् ।

हिन्दु नेपालीहरूको दशैं पर्व झैं पुजासँगै सामूहिक भोज, नाचगान गरेर उनीहरूले भव्य रूपमा यो पर्व मनाएका हुन् । जन्मेदेखि मृत्युसम्म माझी जातिको धर्म संस्कार संस्कृति यहि खोला खहरे नदी आदिमा हुने भएकोले गर्दा माझीले आदिम कालदेखि कोशीलाइं पूजा गर्दै आएका छन् । कोशी पूजा संरक्षण समिति, जालपादेबी युबा क्लब बाहुनेपाटीले इन्द्रावती नदी बगरमा आयोजना गरेको कार्यक्रममा जिल्ला समन्वय समिति सिन्धुपाल्चोकका प्रमुख कृष्णगोपाल तामाङले विधिवत रुपमा पूजा गर्दै खोलामा जाल खेलेर कार्यक्रम सुरु गरेका थिए ।

तामाङले माझीहरुको पुर्खौली पेशा संकटमा परेकोमा चिन्ता व्यक्त गर्दै समुदायको आर्थिक विकासमा टेवा पुग्ने कामहरु गर्नुपर्ने बताए । कार्यक्रममा समन्वय समितिका सदस्य सकुन्तला माझी, इन्द्रावती गाउँपालिका– ११ का वडाध्यक्ष मने माझी, नेपाल माझी उत्थान संघ केन्द्रीय सदस्य सन्तबहादुर माझी लगायतले कार्यक्रमको शुभकामना दिएका थिए ।

अमृत माझी सञ्चालन गरेको सो कार्यक्रमको अध्यक्षता कोशी पूजा संरक्षण समितिका अध्यक्ष रामचन्द्र माझीले गरेका थिए । माझी समुदायले लदी पर्वलाई राष्ट्रिय पर्वको मान्यता र सार्वजनिक बिदा दिन माग गर्दै आएका छन्। लोप हुँदै गएको कोशी पर्व नेपाल माझी उत्थान संघले वि.सं. २०५५ मा सिन्धुलीको मरिन खोलामा पूजा गरेर पुनः सुरु गरेको थियो ।