७ करोड लागनी गरी व्यवसायिक कृषि गर्दै ककनीका युवा

हेलम्बु । सिन्धुपाल्चोकको हेलम्बु गाउँपालिका– ३ ककनीका पाँच युवाले ७ करोड लगानी गरी व्यवसायिक कृषि फार्म सञ्चालन गरिरहेका छन् ।

उनीहरुले ५ सय रोपनी जग्गामा कृषि फर्म सञ्चालन गरेका छन् । किवी खेतीलाई प्राथमिकता दिएका उनीहरुको फार्ममा ५ हजार बढी किवीको विरुवा छन् । ‘शुरुआतमा हामीले २ सय ओटा किवीका बिरुवा रोपेका थियौं’, हेलम्बु एग्रो फार्म एण्ड रिसर्च सेन्टरका सञ्चालक लाक्पा लामाले भने, ‘अहिले ५ हजार बढी किवीका विरुवा छन् । त्यसको साथै कागती, सुन्तोला लगायत फलफूलका विरुवा समेत फार्ममा रहेका लामाले बताए ।

उनीहरुले फार्ममा आलु खन्ने, गोलभेँडा, सागजस्ता नगदेबालीसमेत लगाएका छन् । गत असार १ गते आएको बाढीले हेलम्बु–मेलम्ची क्षेत्रलाई तहसनहस बनाएपछि सो क्षेत्रको कृषि व्यवसाय ठप्पप्रायः छ । तर उनीहरुले विपद्को अवस्थामा समेत कृषिकर्ममा जुटिरहेका छन् । ‘बाढीका कारण केहि अवरोध त भयो नै, तर पनि हामी कृषि पेशालाई निरन्तरता दिईरहेका छौं’, उनले भने, ‘वर्खा याममा भने बाटो बिग्रने कारण उत्पादित सामग्री ढुवानीको लागि अलि समस्या हुन्छ ।’

केही प्रकोप नभए अर्काे वर्षदेखि किवीले पनि फल दिने र यातायात पनि सहज हुने आशा उनले गरेका छन् । शुरुआती चरणमा लाक्पा र उनको समूहले करीब ५०० रोपनीमा खेती शुरू गरेका हुन् । उनीहरूले ५०० वर्गमीटरको ग्रीन हाउस र १८ ओटा टनेल बनाएर खेती गरेका थिए । अनुभवको कमीको पहिलो वर्ष भने खेतीबाट घाटा लागेको लाक्पाले बताए । ‘नयाँ माटो र मलको उचित प्रबन्ध गर्न नसक्दा र नजान्दा पहिलो वर्ष लगानी पनि उठेन’, उनले भने । उनीहरूले नियमित रूपमा ६ जनालाई र आवश्यकता अनुसार ४०–५० जनालाई रोजगारी दिएका छन् । फार्ममा स्थानीय विद्यालयका विद्यार्थीलाई पनि संलग्न गराउँदै आएका छन् ।

गाउँका युवा विदेशिने गरेको र कोरोना महामारीका कारण पर्यटकीय क्षेत्र हेलम्बु सुनसान हुन थालेपछि सामूहिक खेती गरी आन्तरिक पर्यटक भित्राउने अभियानस्वरूप कृषि शुरू गरिएको उनीहरूको भनाइ छ । आन्तरिक पर्यटकलाई आकर्षित गर्न अग्र्यानिक कृषिसँगै रिसोर्ट समेत सञ्चालनको तयारीमा रहेका उनीहरूले बताएका छन् ।