मताधिकारबाट बञ्चित हुन नपरोस् भन्दै नागरिक समाजले बुझायो ज्ञापनपत्र

चौतारा । हराएका मतदाता परिचय पत्रको निर्वाचन आयोगले गरेको पछिल्लो व्यवस्था त्रुटीपूर्ण रहेको भन्दै नागरिक समाज सञ्जाल सिन्धुपाल्चोकले जिल्ला प्रशासन मार्फत निर्वाचन आयोगलाई ज्ञापन पत्र बुझाएको छ ।

जिल्लामा क्रियाशिल नागरिक समाजका प्रातिनिधि संस्थाहरुले सोमबार संयुक्तरुपमा हस्ताक्षर गरी ज्ञापन पत्र बुझाएको हो । नागरिक समाज सञ्जालको संयोजक तथा गैरसरकारी संस्था सिन्धुपाल्चोकका अध्यक्ष गोविन्द सापकोटाको नेतृत्वमा गएका प्रतिनिधिहरुले प्रमुख जिल्ला अधिकारी वेदनिधि खनालमार्फत ज्ञापन पत्र बुझाएका थिए ।

‘सबै क्षेत्र निर्वाचनको लागि तयारी गर्दै गरेको परिवेशमा निर्वाचान आयोगले गरेको पछिल्लो मतदाता परिचय पत्र सम्बन्धि व्यवस्थामा हामी नागरिक समाजका प्रतिनिधिहरुको गम्भिर ध्यानाकर्षण भएको छ’, ज्ञापन पत्रमा भनिएको छ– ‘मतदान नागरिकको नैसर्गिक अधिकार हो । यसलाई सबैले सम्मान गर्नु पर्दछ । आगामी निर्वाचन प्रयोजनका लागि मतदाताहरुको मताधिकारबाट बञ्चित हुन नपरोस् भन्ने ध्ययेका साथ यो पटक पुनः सम्प्र्ण मतदाताको परिचयपत्र छपाई गरी वितरण गर्ने व्यवस्था मिलाउन वाञ्छनीय भएकोले यो ध्यानाकर्षण पत्र प्रेषित गर्दछौं ।’

यस अघि आयोगले सूचना जारी गरी मतदाता परिचयपत्र हराएकाको लागि स्थानीय वडाको सिफारिससहित फागुन २० गतेसम्म जिल्ला निर्वाचन कार्यलयहरुमा निवेदन दिन आह्वान गरेको थियो । तर फागुन १२ गते गैरसरकारी संस्था महासंघको आयोजनामा भएको अन्तर्क्रिया कार्यक्रममा आयोगको यो निर्णय गलत भएको भन्ने सहभागिहरुको साझा मत रहेका कारण त्यसलाई सच्याउन आयोगलाई प्रमुख जिल्ला अधिकारीमार्फत ध्यानाकर्षण पत्र बुझाईएको सापकोटाले बताए ।

अन्तर्क्रियामा मतदाताहरुले स्थानीय वडामार्फत सिफारीस पाउन समेत नसकेको गुनासो गरेको सापकोटाले जानकारी दिए । निर्वाध मत हाल्न पाउने नागरिकको अधिकारलाई सम्मान गर्न नागरिक समाजका प्रतिनिधिहरुको मात्रै नभई सबै क्षेत्रबाट पहल हुन सकेमा सम्पूर्ण मतदाताको परिचय पत्र छापिएर आउने विश्वाससमेत व्यक्त गरे ।

ज्ञापनपत्र बुझ्दै प्रमुख जिल्ला अधिकारी खनालले महत्वपूर्ण विषयमा नागरिक समाजको यो कदम प्रसंशनीय रहेका बताए । उनले यसबारे सबै क्षेत्रको प्रयाप्त दवाव रहनुपर्ने औल्याए ।