९६ मोतियाविन्दु बिरामीको निःशुल्क शल्यक्रिया

चौतारा । लामो समयदेखि मोतियाविन्दुका कारण आँखाको दृष्टि गुमाएका ९६ जना बिरामीको सिन्धुपाल्चोकको सदरमुकाम चौतारामा निःशुल्क शल्यक्रिया गरिएको छ ।

तिलगंगा आँखा प्रतिष्ठान, जिल्ला सामुदायिक आँखा केन्द्र तथा नेपाल रेडक्रस सोसाइटी जिल्ला शाखा सिन्धुपाल्चोकको आयोजनामा फागुण २५ र २६ गते गरिएको शिविरमा ९० वर्षसम्मका ९६ जना मोतियाविन्दु भएका बिरामीको निःशुल्क सफल शल्यक्रिया गरिएको हो ।

तिलगंगा आँखा प्रतिष्ठानको रेटिना विशेषज्ञ डा. रभा थापाको नेतृत्वमा भएको उक्त शिविरमा मोतियाविन्दुका बिरामीहरुको डा. थापा एक्लैले सफल शल्यक्रिया गरेकी थिईन् । शल्यक्रिया शिविर हुनुपूर्व भिमटार, ठूलोसिरुवारी, ढाँडे, याङ्लाकोट र यामुनाडाँडामा आँखा शिविर पश्चात चौतारामा शल्यक्रिया शिविर सञ्चालन गरेका थिए । उक्त शिविरहरुमा ६ सय ४८ जनाको आँखा परीक्षण गरिएको थियो ।

जिल्ला सामुदायिक आँखा केन्द्रको स्थापना पश्चात वर्षको दुईपटकसम्म स्थानीय स्तरमै शैल्यक्रिया शिविर सञ्चालन गर्दै आएकोमा कोभिडको महामारीका कारण गत वर्ष शिविर नभएको हुंदा जिल्लामा मोतीयाविन्दुको अप्रेशन गर्नु पर्ने बिरामी अझै भएकोले अर्को शिविर पनि छिट्टै सञ्चालन हुने केन्द्रका अध्यक्ष एवम् रेडक्रस सभापति राजेन्द्रमान ताल्चाभडेलले जानकारी बताए ।