अग्रज पत्रकार राम केसीको निधन

चौतारा । सिन्धुपाल्चोक जिल्लाको अग्रज पत्रकार एवम् राष्ट्रिय समाचार समिति (रासस) का वरिष्ठ समाचादारता राम केसी ‘चौतारे’ को ७५ वर्षको उमेरमा विहीबार साँझ निधन भएको छ ।

दमरोग र छातीमा सङ्क्रमणका कारण अस्वस्थ भएका चौतार साँगाचोक नगरपालिका– ७, सानो सिरुवारी निवासी केसी गत कात्तिकदेखि उपचारार्थ थिए । उनको स्वास्थ्यमा थप समस्या देखिएपछि सिनामङ्गलस्थित काठमाडौँ मेडिकल कलेजको सघन उपचार कक्षमा उपचाररत थिए । उनको अस्पतालमै निधन भएको अस्पताल प्रशासनले पुष्टि गरेको छ ।

नेपाल पत्रकार महासंघ सिन्धुपाल्चोकको पूर्व केन्द्रिय पार्सद्समेत रहेका उनी विसं २०२६ देखि पत्रकारिता सुरु गरेका केसी विसं २०५३ वैशाख १ गतेदेखि राससमा कार्यरत थिए । नेपाल पत्रकार महासंघको प्रेस स्वतन्त्रता सेनानी सम्मान– २०७४, २०७६ मा कृष्णरत्न गंगा माविद्वारा साहित्य सम्मान, २०७६ मा प्रेस युनियन सिन्धुपाल्चोकबाट सम्मान, २०६० मा दैवीप्रकोक उद्दार पदक, २०५७ मा मिडिया प्वाईन्ट पुरस्कार, २०५४ र २०५७ मा राष्ट्रिय समाचारबाट उत्कृष्ट समाचार लेखन पुरस्कारलगायत दर्जन बढी सम्मान र पुरस्कार प्राप्त गरेका केसीको उत्पीडन (कथा संग्रह २०५०), सुस्केरा र सुसेली (गीति संग्रह २०६०) र नियति (कथा सङ्ग्रह) प्रकाशित छन् ।

केसीको निधनप्रति साँझनै प्रेस सेन्टर नेपाल जिल्ला समन्वय समिति सिन्धुपाल्चोकले शोक विज्ञप्ती जारी गरी श्रद्धाञ्जली व्यक्त गरेको छ । सचिव सुन्दर शिरीषद्वारा जारी विज्ञप्तीमा भनिएको छ, ‘केसीको निधनले सिन्धु पत्रकारिता र सिन्धु साहित्यको क्षेत्रमा एउटा अपूरणीय क्षति पुगेको छ । दिवंगत केसीप्रति भावपूर्ण श्रद्धाञ्जली व्यक्त गर्दै शोकाकुल परिवारजनमा गहिरो समवेदना व्यक्त गर्दछौं ।’