प्रेमध्वजले गरे वंशलाललाई समर्थन, जीतको ढोका खुल्यो

नेपाली कांग्रेस सिन्धुपाल्चोकको जारी १४औं जिल्ला अधिवेशनमा सभापतिको उम्मेद्वार डा.प्रेमध्वज लामाले वंशलाल तामाङलाई समर्थन गरेका छन् ।

जिल्ला सभापतिमा तेस्रो मत ल्याएका लामाले तामाङलाई समर्थन गरेपछि सभापतिमा वंशलाल तामाङको जीतको ढोका खुलेको छ चौतारास्थित होटल अरनिको आईतबार बिहान पत्रकार सम्मेलन गरी लामाले आफ्ना मतदाताहरुलाई सभापतिमा वंशलाललाई मत हाल्न आग्रह समेत गरे । ‘मैले वंशलाल तामाङलाई सहयोग गर्ने निर्णय गरेको छु,’ पत्रकार सम्मेलनमा उनले भने– ‘४३ सालदेखि मोहन बस्नेतसँगसँगै राजनीतिक यात्रामा रहें तर आज अपमान खानुपर्यो । सिन्धु कांग्रेसको शीर ठाडो गर्न मैले वंशलाललाई समर्थन गरेको हुँ, मेरा मतदाताहरुलाई तामाङलाई मत हाली जिताउन आग्रह गर्दछु ।’

शुरुबाटै उम्मेद्वारी प्रचार गरेका प्रेमध्वजले संस्थापन मोहन बस्नेतले औपचारिक उम्मेद्वार नबनाएपछि बागी उम्मेद्वारी दिएका थिए । आईतबार राती १२ बजे सम्पन्न भएको मत गणनामा सभापतिको उम्मेदवार जंगबहादुर तामाङले ७ सय ५, बंशलाल तामाङले ६ सय २९ र डा. प्रेमध्वज लामाले ४ सय ९३ मत प्राप्त गरे । कुल खसेको १ हजार ८ सय ६७ मत मध्ये ४० मत बदर भएको निर्वाचन समितिले जनाएको छ ।

सभापतिको उम्मेदवार निर्वाचित हुन ५१ प्रतिशत मल ल्याउनुपर्ने कांग्रेसको प्रावधान अनुरुप तीनै जना उम्मेदवारले सो अनुरुपको मत ल्याउन नसकेका कारण दोस्रो चरणमा चुनाव गरिने निर्वाचन हुँदैछ ।