सूचना अधिकारीहरु आफैंले सूचना नपाएको गुनासो

चौतारा । स्थानीय सरकारका सूचना अधिकारीहरुले कार्यलयले सूचना अधिकारीको जिम्मेवारी दिए पनि कार्यलयकै सूचना पाउन मुस्किल रहेको बताएका छन् ।

साुमदायिक सारथीको आयोजना र जिल्ला प्रशासन कार्यालय सिन्धुपाल्चोकको समन्वयमा सूचनाको हक अन्र्तगत स्वत प्रकाशन गनुपर्ने सूचनाको अवस्था र चुनौती विषयक अभिमुखिकरण कार्यक्रममा सहभागि सूचना अधिकारीहरुले यस्तो बताएका हुन् । स्थानीय तहमा सूचना लुकाउने समस्या बढी भएको भन्दै आफूहरु समस्यामा रहेको सूचना अधिकारीहरुले बताए । छलफलमा अधिकांश स्थनीय सरकार तथा जिल्लाका कार्यलयमा स्वत प्रकाशन गर्नुपर्ने सूचना प्रकाशन नभएको बताए ।

कार्यक्रममा बोल्दै सहायक प्रमुख जिल्ला अधिकारी तथा सूचना अधिकारी समतिको संयोजक निराजन श्रेष्ठले आगामी चैत्र महिनामा सबै कार्यलयले स्वत प्रकाशन गर्नुपर्ने सूचनाहरु अनिवार्य प्रकाशन गर्न निर्देशनका साथ प्रतिवद्धता व्यक्त गरे । उनले सूचना माग गर्नेहरु मध्ये १० प्रतिशत मात्रै सहि हुने नत्र बाँकी सब तनाब दिने मात्रै देखिएको बताए । उनले सूचना अधिकारीहरु विना हतियारको सैनिक झै रहेको भन्दै कार्यालय प्रमुखलाई पनि सो जिम्मेवारी दिईनुपर्ने धारणा राखे ।

कार्यक्रममा मेलम्ची नगरपालिकाका सूचना अधिकारी झपेन्द्रनाथ खरेलले केहि व्यक्तिहरु अनावश्यक सूचना माग गर्ने र कर्मचारीलाई तनाव दिने नियतले माग गर्ने गरेकोले मारमा परेको बताए । पाँचवर्षको सबै विवरण माग गर्ने, पाँचवर्ष भरीको खरिदको विवरण, योजनको विवरणजस्ता विषय राखेर सूचना माग्नेहरुको संख्या बढेको उनको भनाई छ । त्यस्तै पाँचपोखरी थाङ्पाल गाउँपालिकाका सूचना अधिकारी रामप्रासाद न्यौपानेले पनि आफु यस्तै समस्याको शिकार भएको बताए ।

‘सूचना माग भए बमोजिम ३०० पृष्ठको सबै विवरण माथिल्लो तहमा उजुरी पर्ला भनेर हतार हतार तयार गरियो, तर तयार भईसकेपछि फोन गर्दा समेत लिन आउँदैन,’ उनले भने– ‘यस्तालाई चाँहि कारबाही गर्ने व्यवस्था छैन ?’ कार्यलयको कामको तनावसंगै लिएको थप जिम्मेबारीको धेरै ठूलो भारीले थिचेको उनले बताए ।