माओवादीले व्यवस्था मात्रै होईन अवस्था परिवर्तन गर्छः सापकोटा

चौतारा । नेकपा (माओवादी केन्द्र)का केन्द्रिय सदस्य एवम् सिन्धुपाल्चोक जिल्ला इन्चार्ज माधव सापकोटाले माओवादी अरु पार्टीमा भिन्न रहेको भन्दै पार्टीले व्यवस्था मात्रै होईन अवस्था परिवर्तन गर्ने बताएका छन् ।

सिन्धुपाल्चोकको चौतारा साँगाचोकगढी नगरपालिका– ४ कुविण्डे स्थित सेतीदेवी पञ्चकन्या माध्यमिक विद्यालयको अभिभावक भेला तथा पूर्व विद्यार्थी पुनर्मिलन समारोहलाई सम्बोधन गर्दै सोमबार नेता सापकोटाले जनयुद्धको माध्यमबाट जनआन्दोलनलाई समेत जोडेर व्यवस्था परिवर्तन गरिएको बताए । ‘हामीले व्यवस्था परिवर्तन गर्यौं, व्यवस्थापन परिवर्तन मात्रै गरेर पुग्दैन सिंगै गरिव नेपाली जनताको आर्थिक, सामाजिक, सांस्कृतिक जीवन स्तरलाईसमेत बदल्नु पर्छ’, उनले भने ।

शान्तिपूर्ण बाटो अवलम्वन गरेर भोटको माध्यमबाट जनतालाई अभिमत दिन सक्षम बनाउने माओवादीको योजना रहेको सुनाउँदै सापकोटाले आर्थिक संमृद्धिको बाटोबाट हिँडेर समाजवादसम्म पुग्ने लक्ष्य रहेको बताए । ‘पुजिँवादीहरु अहिलेको व्यवस्थालाई तानेर पुजिँवादीकरण गर्ने तिर सोचिरहेका छन्’, सापकोटाले भने– ‘हामी क्रान्तिकारीहरु आर्थिक समृद्धिको माध्यमबाट समाजवादसम्म पुर्याउने अठोट गरिरहेका छौं ।’ उनले भिन्न तरिकाका साथ प्रतिष्पर्धालाई स्वीकार गरेर माओवादीले क्रान्तिलाई जारी राखेको बताए ।

एमसीसीको विषयमा बोल्दै नेता सापकोटाले यसको विषयमा माओवादीले आफ्नो अडान नछाडेको जिकिर गरे । ‘एमसीसी अमेरिकी रणनीतिकै एउटा अंग हो, माओवादी यो कुराबाट पछाडी हटेको छैन’, उनले भने– ‘एमसीसीलाई परियोजनामा मात्रै सिमित रहनुपर्ने जोड अहिले पनि हाम्रो हो ।’ उनले एमसीसीका व्याख्यात्मक टिप्पणीमा दक्षिणपन्थी र उग्रवादीहरुलाई निरुत्साहित गर्न सफल रहेको उनको भनाई थियो ।

माओवादीले लिएको विकासको लक्ष्यहरु पूरा गर्न दृढ रहेको भन्दै सिन्धुपाल्चोकमा ७० प्रतिशत लक्ष्य पूरा भएको बताए । ‘केहि केहि विकासका लक्ष्यहरु पूरा गर्न बाँकी छ, त्यसलाई पनि क्रमसः माओवादीले पूरा गर्छ,’ उनले भने ।