अघि बढ्यो भोटेकोशी– १ जलविद्युत् आयोजनाको निर्माण प्रक्रिया

चौतारा । शैलुङ पावर कम्पनी प्रालिले सिन्धुपाल्चोक जिल्लाको भोटेकोशी गाउँपालिकामा ४० मेगावाट क्षमताको भोटेकोशी– १ जलविद्युत् आयोजना निर्माण प्रक्रिया अघि बढाएको छ ।

भोटेकोशी गाउँपालिकामा अढाई दशकअघि बनेको ३६ मेगावाटको अपर भोटेकोशी आयोजनाको पावर हाउसबाट निस्केको पानी प्रयोग गरेर नयाँ आयोजना निर्माण गर्न लागिएको कम्पनीका अध्यक्ष बच्चु पौडेलले जानकारी दिए । विद्युत् खरिद सम्झौता भइसकेको छ भने अनुमानित लागत सार्त अर्ब २० करोड रहेको उनले बताए ।

भोटेकोशीको पानी झण्डै तीन किलोमिटर सुरुङबाट स्थानीय चाकुमा निर्माण हुने अन्डरग्राउन्ड पावरहाउसमा प्रवेश गराइनेछ । अरनिको राजमार्गको बाह्रबिसे–तातोपानी खण्डमा पर्ने आयोजनाका लागि प्रवेशमार्ग निर्माण, जग्गा अधिग्रहणलगायत काममा झन्झट नरहेको उनले बताए । निर्माण सहज हुने अनुमान गरिएको र स्थानीयका मागलाई प्राथामिकतामा राख्ने पनि अध्यक्ष पौडेलको भनाइ छ ।

आयोजनाले विहीबार भोटेकोशी गाउँपालिका– ४ झिर्पुमा परिमार्जित प्रारम्भिक वातावारणीय परिक्षण प्रतिवेदन सम्बन्धि सार्वजनिक सुनुवाई सम्पन्न गरेको छ । भोटेकोशी गाउँपालिकाको वडा नम्बर १, ३, ४ र ५ प्रभावित हुने आयोजनाले गरेको सार्वजनिक सुन्ुवाईमा स्थानीय बासीन्दासँगै जनप्रतिनीधि तथा राजनीतिक दलका प्रतिनिधिहरुको सहभागीता रहेको थियो ।

सार्वजनिक सुनुवाईमा सहभागी स्थानीय बासिन्दाले आफुहरुको बस्तीको सुरक्षा, रोजगारी, विकास निर्माण तथा आयोजनामा शेयर पाउनुपर्ने लगायतका माग राखेका छन् । उनीहरुले आयोजना बनेको कारण बस्ती जोखिममा हुन नहुने बताए । सार्वजनिक सुनुवाई कार्यक्रममा नेकपा माओवादी केन्द्रको भोटेकोशी गाउँपालिकाका इन्चार्ज आङ दोर्जे शेर्पा, नेकपा एमालेको भोटेकोशी गाउँपालिकाका अध्यक्ष अमृतकुमार खड्का, नेपाली काँग्रेसको भोटेकोशी गाउँपालिकाका सभापती देबीबहादुर बुढाथोकी, प्रभावित क्षेत्रका जनप्रतिनिधिहरुले आफ्ना धारणा राखेका थिए ।

सार्वजनिक सुनुवाईमा उपस्थित धेरैको चासो आयोजना बनेपछि बस्ति सुरक्षित हुन्छ कि हुँदैन भन्ने थियो । सिन्धुपाल्चोकमा विपदका घटना भइरहने भएकोले पनि धेरै जना डराएका छन् । सो कार्यक्रममा उठेका सवाललाई सम्बोधन गर्दै कम्पनीका अध्यक्ष पौडेलले स्थानीयलाई रोजगारी, बस्तीको सुरक्षा, पूर्वाधार. विकास, शेयर लगायतका कुरा प्रचलित कानुन, स्थानीय आवश्यकता र समझदारीमा पूरा गरिने बताए ।