बलेफीमा माओवादीबाट गंगा तामाङ सर्वसम्मत सिफारिस

बलेफी । अघिल्लो निर्वाचनमा एमाले उमेदवार केदार क्षेत्रीसँग झिनो मतान्तरले हार व्यहोरेका माओवादीका युवा नेता गंगा तामाङ प्रवेशलाई माओवादी बलेफी गाउँपालिकाले आसन्न निर्वाचनका लागि अध्यक्ष पदमा सर्वसम्मत सिफारिस गरेको छ ।

बलेफीमा भएको भेलामा पालिका कमिटिले नै प्रस्ताब गरेर अध्यक्षका लागि तामाङको नाम सिफासिर गरेको हो । छलफलका क्रममा हाल वडन नं ३ का अध्यक्ष बिरमान तामाङ, वडा नं ६ का अध्यक्ष चित्र बहादुर तामाङ र युवा नेता रामप्रसाद न्यौपानेले पनि पालिका अध्यक्षका लागि आफूहरु पनि तयार रहेको बताएका थिए । छलफल पछि पालिका अध्यक्ष उज्जार कार्कीले बलेफी गाउँपालिकाको पार्टी कमिटिका तर्फबाट गंगा तामाङ प्रवेशको सर्व सम्मत सिफारिस गरिएको सुनाएका थिए ।

बलेफी गाउँपालिकामा उपाध्यक्षका लागि भने चार जनाले दावी गरेका छन् । उपाध्यक्षका लागि दुर्गा नेपाल, देवकी न्यौपाने, जुना कार्की र शारदा आचार्यको दावी परेको हो । आठवटा वडा रहेको बलेफीमा वडा नं १ जलविरेमा मात्रै अध्यक्षका लागि सर्वसम्मत भएको छ । वडा नं १ ले दिलप्रसाद कर्माचार्यको नाम सिफारिस गरेको हो । उनी यस अघिको निर्वाचनमा पनि उमेदवार थिए । तर त्यहाँ एमालेका मधु थापाले बाजि मारेका थिए ।

बलेफी गाउँपालिका मध्ये जलविरेमा नेकपा समाजवादीले तुलनात्मक रुपमा बलियो रहेको दावी गरिरहेका छन् । हाल समाजवादीका सबै नेता कार्यकर्ता एमालेबाटै अलग भएका हुन् । यसले कर्माचार्यको आत्मविश्वास बढाएको छ । यस्तै बलेफी गाउँ पालिका वडा नं २ मा माओवादी केन्द्रले बडाध्यक्षमा दुइ जनाको नाम सिफारिस गरेको छ । यस अघिको चुनाबमा कांग्रेसका छविलाल न्यौपानेसँग पराजित पुरुषोत्तम सापकोटा र हालका वडा पार्टी अध्यक्ष रघुनाथ न्यौपाने सो वडाको अध्यक्ष पदका लागि दावी प्रस्तुत गरेका छन् ।

उपल्लो तहका नेताको बसोबास रहेको बलेफी २ मा माओवादीको पहिले देखिनै बलियो संगठन छ । अघिल्लो चुनामबा माओवादी र एमाले दुबैबाट भोट क्रस भएपछि कांग्रेसले बाजि मारेको थियो । यसपाली माओवादीका कार्यकर्तामा मजबुत एकता देखिएपछि कांग्रेस वृत्तमा खैलाबैला मच्चिएको छ । यहाँ एमाले निकै कमजोर रहेको बताइन्छ । माओवादीको बलेफी ३, ४, ५ ६ ७ र ८ मा दुइभन्दा बढीले उमेदवारको दावी रहेको छ ।