उम्मेदवार छान्न सकस, सिन्धुपाल्चोकमा माओवादीद्वारा आधा पालिका दाबी

चौतारा । सत्ता साझेदार गठबन्धन दलहरूलाई स्थानीय तहमा उम्मेदवार छान्न सकस परेको छ । कांग्रेस, माओवादी केन्द्र र एकीकृत समाजवादीका नेताहरू दैनिकजसो छलफलमा छन् । पटक पटक बैठक बसे पनि ठोस निर्णय र सहमति हुन सकेको छैन ।

सिन्धुपाल्चोकका १२ स्थानीय तहमा गठबन्धनका प्रमुख दुई दल कांग्रेस र माओवादीले बराबरी हिस्सा दाबी गरिरहेकाले उम्मेदवार छान्न सकस परेको हो । ०७४ को स्थानीय चुनावमा कांग्रेसले तीन र माओवादी केन्द्रले दुई तह जितेका थिए । त्यसकै आधारमा एक सिट बढी पाउनुपर्ने कांग्रेसको दाबी छ । तर, मतभार र पछिल्लो समयमा बढेको संगठनको आधारलाई मान्नुपर्ने दाबी गर्दै माओवादी केन्द्रले बराबरी सिट बाँडफाँड हुनुपर्ने अडान राखेको छ ।

सात सिटमा विजयी एमालेको सिटमा आफूहरू पनि बलियो रहेको छलफलमा एकीकृत समाजवादीका नेताहरूले दाबी प्रस्तुत गरेका छन् । एमाले विभाजनपछि पूर्वसांसद सुभाष कर्माचार्यसहित संगठनमा प्रभाव पार्ने नेता एकीकृत समाजवादीमा गए पनि मेलम्ची नगरपालिकाकी उपमेयर भगवती नेपाल र दुई वडाध्यक्षबाहेक अरू जनप्रतिनिधिले एमाले छोडेनन् । एमाले छोडेका बलेफी गाउँपालिका अध्यक्ष केदार क्षेत्री कांग्रेस प्रवेश गरिसकेका छन् ।

जनप्रतिनिधि नभएको कमजोर पृष्ठभूमिमा एकीकृत समाजवादीलाई सिट दाबी गर्न कठिन परेको छ । गठबन्धनको बैठकमा तीनवटै पार्टीले आ–आफ्नो दाबी प्रस्तुत गर्नेबाहेक कुनै ठोस प्रगति भएको छैन । पहिलो स्थानीय चुनावमा कांग्रेसले सुनकोशी, इन्द्रावती र हेलम्बु गाउँपालिका जितेको थियो ।

एमालेले जितेको बाह्रबिसे नगर, मेलम्ची नगर, त्रिपुरासुन्दरी र जुगल गाउँपालिकामा कांग्रेस निकटतम् प्रतिद्वन्द्वी हो । एमालेले जितेको लिसंखुपाखर र बलेफीमा माओवादी केन्द्र निकटतम् प्रतिद्वन्द्वी हो । जुगल गाउँपालिकामा कांग्रेस दोस्रो भए पनि वडाको मतभार बढी र माओवादी केन्द्रको अहिलेको संगठन मजबुत रहेको आ–आफ्नो दाबी छ । कांग्रेस र माओवादीले बराबरी सिटमा दाबी गरिरहँदा एकीकृत समाजवादीले कम्तीमा एक स्थानीय तह पाउनुपर्ने कुरा छलफलमा उठाएको छ ।

कांग्रेस र माओवादीको भागमा बराबरी सिट भागबन्डा गरेपछि माओवादीले एकीकृत समाजवादीलाई आफ्नो भागबाट एक सिट दिनुपर्ने प्रस्ताव आएको बताइएको छ । गठबन्धनको छलफल सकारात्मक दिशातिर अगाडि बढेको कांग्रेस जिल्ला सभापति जंगबहादुर तामाङले बताए ।

आधा पालिकामा माओवादीको दाबी

नेकपा माओवादी केन्द्र, सिन्धुपाल्चोकले चुनावी तालमेलका लागि आधा पालिकाको नेतृत्व पाउनुपर्ने दाबी गरेको छ । माओवादी केन्द्रका केन्द्रीय सदस्य एवम् सिन्धुपाल्चोकबाट वागमती प्रदेशसभा सांसद रहेका युवराज दुलालले आफूहरुले आधा पालिका दाबी गरेको बताए ।

‘माओवादीको दाबी बराबरी सिद्धान्तमा जाने भन्ने छ,’ उनले भने, ‘कांगेसको हामीलाई बढी चाहिन्छ भन्ने खालको छ । यसमै कुरा मिलेको छैन ।’ गठबन्धनमा सहमति नभए सबै पालिकामा एकल रुपमा लड्ने गरी तयारी गरिरहेको दुलालले बताए ।