मेलम्चीको बनमा आगलागी हुँदा पाँच हजार बढी बिरुवामा क्षति

मेलम्ची । मेलम्ची नगरपालिकाको दुई सामुदायिक वनमा आगलागी हुँदा करीब पाँच हजार पाँच सय बिरुवामा क्षति पुगेको छ ।

शनिबार मेलम्ची नगरपालिका– १२ मा रहेको जामुनेपाखा सामुदायिक वनको ४ हेक्टर वन क्षेत्रमा आगलागी हुँदा १ हजार ५ सय बिरुवा र जोसेपाखा सामुदायिक वनको १० हेक्टरमा आगलागी हुँदा ४ हजार बिरुवामा क्षति पुगेको हो । अहिले आगो नियन्त्रणमा आएको सबडिभिजन वन कार्यालय मेलम्चीका प्रमुख बच्चुराम पुडासैनीले बताए । वन कर्मचारी टोली र सशस्त्र प्रहरी बल मेलम्ची बेसका सशस्त्र प्रहरी निरीक्षक रामेश्वर श्रेष्ठ नेतृत्वको संयुक्त टोलीको लगातार करीब ३ घण्टाभन्दा बढी समयको प्रयास पछि आगो नियन्त्रणमा आएको कार्यालयका प्रमुख पुडासैनीले बताए ।

जनशक्तिको अभावमा उक्त आगो नियन्त्रणमा लिन हम्मे हम्मे परेको भएता पनि नियन्त्रणमा लिन सफल भएको सशस्त्र प्रहरी बल मेलम्ची बेसका सशस्त्र प्रहरी निरीक्षक रामेश्वर श्रेष्ठले बताए । यस्तै, आगो नियन्त्रण लगतै सबडिभिजन वन कार्यालय मेलम्चीले विज्ञप्ति निकाल्दै वन कर्मचारी टोली र सशस्त्र प्रहरी बल मेलम्चीलाई धन्यवाद समेत व्यक्त गरेको छ । विज्ञप्तिमा उक्त आगो निभाउन स्थानीय सामुदायिक वन उपभोक्ता समूहका पदाधिकारी तथा स्थानीय समुदायलाई पटक पटक अनुरोध गर्दा कोही पनि सहभागी हुन नआएको र डाँडामा बसेर रमिता हेरेको भन्दै दुखेको समेत व्यक्त गरिएको छ ।

समुदायमा आधारित वन व्यवस्थापन पद्धति अन्तर्गत सामुदायिक बनको मर्ममाथि नै उपहास भएको पनि विज्ञप्तिमा उल्लेख गरिएको छ । साथै आगो लगाउनेको खोजी भईरहेको कार्यालयका प्रमुख पुडासैनीले बताए ।