मेयरका उम्मेदवार ढुङ्गानाले गरे मतदातासँग तमसुक

चौतारा । उन्नत लोकतन्त्र पार्टीबाट सिन्धुपाल्चोकको चौतारा साँगाचोकगढी नगरपालिकाको मेयरका उम्मेद्वार भेषनाथ ढुङ्गानाले मतदातासँग तमसुक गरेका छन् ।

आईतबार पार्टी कार्यालय चौतारामा भएको पत्रकार भेटघाट एवम् तमसुक पत्र सार्वजनिक कायक्रममा उम्मेदवार ढुङ्गानाले मतदातासँग १८ बुँदे तमसुक गरेका छन् । उनले आफूले गरेको प्रतिवद्धता अनुरूप काम नभए जुनसुकै बेला मतदाताले फिर्ता बोलाउँदा आफू मञ्जुरी रहेको बताए ।

उन्नत लोकतन्त्र पार्टीको मूल एजेण्डा जनताले सोझै आफ्नो सरकार छान्न पाउने, प्रत्यक्ष निर्वाचित कार्यकारी राष्ट्रपतिय प्रणाली, सांसद्हरू मन्त्री–प्रधानमन्त्री बन्न नपाउने, जनताले नचाहेको उम्मेदवार पार्टीले पठाएमा बहिष्कार गर्न पाउने अधिकार (राईट टु रिजेक्ट), जितेर गएका जनप्रतिनिधिले चुनावी घोषणामार्फत् गरेका प्रतिवद्धता पूरा नगरे भोट फिर्ता माग्न पाउने अधिकार (राईट टु रिकल) रहेको उनले बताए ।

‘१८–२४ वर्षका युवाले अनिवार्य राष्ट्रसेवा गर्नुपर्ने, लोकतान्त्रिक कर प्रणाली कार्यकर्ता व्यवस्थापन गर्नमात्र लादिएको संघीयता खारेज गरी स्थानीय तहलाई अधिकारसम्पन्न गरी अझ मजबुत बनाउने, जासुसी गर्न खोलिएका अन्तर्राष्ट्रिय गैरसरकारी संस्थाहरू खारेज गरी नेपालीलाई नेपालमै रोजगारी दिलाउनेलगायत मागलाई स्थापित गर्दै समुन्नत नेपाल निर्माणका लागि चौतारा साँगाचोकगढी नगरपालिकाका मतदाताहरूसमक्ष म प्रतिवद्धता जाहेर गर्छु’, उनले भने ।

सो कार्यक्रममा उन्नत लोकतन्त्र पार्टीका जिल्ला सदस्य कृष्ण गिरी, नगर सचिव राजेन्द्र आचार्य, वडा नं. ४ का वडा सदस्य उम्मेद्वार विनोद सापकोटा लगायतले आफ्ना भनाई राखेका थिए । सो पार्टीले आईतबार नै चौतारा स्थित मूख्य निर्वाचन अधिकृतको कार्यालयमा समेत तमसुक पत्र बुझाएको छ ।