मेलम्चीमा प्रचार सामग्री हटाईयोः अन्यत्र उस्तै

चौतारा । जिल्ला आचारसंहिता अनुगमन समिति सिन्धुपाल्चोकले राजनीतिक दलहरूले आचारसंहिता विपरीत प्रयोग गरिएका प्रचार सामग्री हटाउन निर्देशन दिएपनि जिल्लाको अधिकांश स्थानमा प्रचार सामग्री हटाईएको छैन ।

निर्देशन दिएपनि प्रचार सामग्री नहटाएपछि मेलम्चीमा प्रहरीले प्रचार सामग्री हटाएको छ । जिल्लाको अन्यत्र स्थानमा भने आचारसंहिता विपरित सार्वजनिक स्थलमा चुनावचिन्ह प्रदर्शन, झन्डाको तोरण प्रदर्शन, चुनाव चिन्हको भित्तेलेखन जस्ताको तस्तै छन् । सोमबार सिन्धुपाल्चोकको चौतारामा बसेको जिल्ला आचारसंहिता अनुगमन समितिको बैठकमा दलहरूले २४ घण्टा भित्र आचारसंहिता विपरीत प्रयोग गरिएका प्रचार सामग्री हटाउन प्रतिवद्धता जनाएका भएपनि सो प्रतिबद्धता पूरा गरेका छैनन् ।

सिन्धुपाल्चोकमा आचारसंहिता उल्लंघन गर्न दलहरूबीच प्रतिष्पर्धा नै चलेको छ । नेपाली काँग्रेस, नेकपा एमाले, नेकपा माओवादी केन्द्र सहित नेकपा एकीकृत समाजवादी सिन्धुपाल्चोकमा क्रियाशील रहेका प्रमुख राजनैतिक दल हुन् । राष्ट्रिय प्रजातन्त्र पार्टी, उन्नत लोकतन्त्र पार्टी, मङ्गोल नेशनल अर्गनाइजेशन लगायतका दल पनि सिन्धुपाल्चोकमा क्रियाशील छन् । उनीहरूमा दलगत प्रतिष्पर्धा भन्दा आचारसंहिता उल्लंघनको प्रतिष्पर्धा भने धेरै देखिन्छ ।

सिन्धुपाल्चोकका मुख्य निर्वाचन अधिकृत एवम् अनुगमन समितिका संयोजक चन्द्रप्रकाश तिवारीले निर्वाचन आचारसंहिता उल्लंघन गर्ने जो सुकैलाई कारबाही गर्ने बताए । आचारसंहिताको उल्लंघन भएमा आचारसंहिता उल्लंघनको प्रकृति र स्वरूप हेरी सचेत गराउने, १ लाखसम्म जरिवाना गर्न सक्ने तथा उम्मेदवारको उम्मेदवारी रद्दसम्म हुने कानूनी व्यवस्थालाई कार्यान्वयन गरिने तिवारीले जानकारी दिए ।

आचार संहिताले राजनीतिक दल वा उम्मेदवारको निर्वाचन चिह्न अङ्कित ज्याकेट, कमिज, भेष्ट, टि–सर्ट, टोपी वा क्याप, गम्छा, मास्क, लकेट, झन्डाको तोरण प्रदर्शन वा अन्य कुनै किसिमको पहिरन वा स्टिकर, लोगो, झोला, ब्याच, ट्याटु जस्ता साङ्केतिक सामग्री उत्पादन गर्न, बिक्री वितरण गर्न वा प्रदर्शन गर्न वा गराउन रोक लगाएको छ ।