सिन्धुका ३ केन्द्र अतिसंवेदनशिल, ३३५० सुरक्षाकर्मी खटिए

चौतारा । सिन्धुपाल्चोकमा स्थानीय तहको निर्वाचनमा सुरक्षा दिन ३ हजार ३ सय ५० सुरक्षाकर्मी खटाइएको छ ।

१ हजार २ सय ८४ म्यादी प्रहरीसहित सो संख्यामा सुरक्षाकर्मी खटाईएको हो । मतदान केन्द्रमा दुई घेराको पहरासहित एकीकृत सुरक्षा योजना कार्यान्वयनमा ल्याइएको छ । मतदान केन्द्रमा नेपाल प्रहरी र म्यादी प्रहरीले प्रत्यक्ष सुरक्षा दिनेछन् भने मदतानस्थल नजिकै बाहिरी घेरामा रहेर सशस्त्र प्रहरी र नेपाली सेनाले सुरक्षा दिनेछन् ।

‘दुई घेराको सुरक्षा नीति अघि सारेका छौँ । मतदानस्थलको संवेदनशीलता हेरेर बाहिरी घेराबाट सशस्त्र वा सेना वा दुवै सम्मिलित संयुक्त टोलीले सुरक्षा दिनेछ,’ प्रमुख जिल्ला अधिकारी बेदनिधि खनालले भने । उनले मतदान केन्द्रलाई अतिसंवेदनशील, संवेदनशील र सामान्य गरी तीन तहमा बाँडेर सुरक्षा रणनीति अघि सारिएको जानकारी दिए ।

जिल्ला सुरक्षा समितिका प्रमुखसमेत रहेका खनालका अनुसार तीन केन्द्रलाई अति संशेदनशील र ५९ लाई संवेदनशील मानिएको छ । सामान्य अवस्थाका मानिएका केन्द्र ८२ छन् । जिल्लामा १ सय ४४ केन्द्र तोकिएका छन् । केन्द्रको अवस्था हेरी प्रहरी र म्यादीसमेत आठदेखि २२ जनासम्म सुरक्षाकर्मी परिचालित हुनेछन् ।

संवेदनशीलमा १५ र अतिसंवेदनशीलमा २२ सुरक्षाकर्मी खटिने प्रजिअ खनालले जानकारी दिए । ‘अतिसंवेदनशील र संवेदनशील मानिएका केन्द्रको तीन सय मिटरभन्दा बाहिरै बसेर हतियारसहितका सशस्त्र र सेनाले सुरक्षा दिने छन्,’ उनले भने । सामान्य अवस्थाका केन्द्रमा पनि गस्तीका रुपमा सशस्त्र र सेनाले सुरक्षा प्रदान गरिरहेका हुनेछन् ।

मतदानको दिन सबै केन्द्रमा नेपाल प्रहरी, म्यादी, सशस्त्र प्रहरी र सेना गरी ३ हजार ३ सय ५० सुरक्षाकर्मी प्रत्यक्ष परिचालन हुने सुरक्षा समितिले जनाएको छ । यो बाहेक बजार र राजमार्ग क्षेत्रमा सुरक्षाकर्मीको नियमित मोबाइल, गस्ति टोली परिचालन हुने प्रजिअ खनालले जनाए । ‘कुनै अप्रिय घटना हुन नदिन संवेदनशील र सचेत छौँ । त्यसै भएर सुरक्षा व्यवस्था चुस्त बनाउने नीति अघि सारेका छौँ,’ उनले भने ।