सिन्धुमा ५ सय ६६ जनप्रतिनिधि चुनिदै

चौतारा । वैशाख ३० गते हुने स्थानीय तह निर्वाचनबाट सिन्धुपाल्चोकमा ५ सय ६६ सदस्यीय जनप्रतिनिधि निर्वाचित हुँदै छन् । उनीहरुले अधिकार सम्पन्न स्थानीय सरकार चलाउने छन् ।

तीन नगरपालिका र नौ गाउँपालिका सहितको जिल्लाका १२ स्थानीय तहमा १ सय ३ वटा वडा छन् । चौतारा साँगाचोकगढी, बाह्रविसे र मेलम्ची नगरपालिकामा ३६ वडा छन् । गाउँपालिकामा ६७ वटा वडा रहेका छन् । स्थानीय तह निर्वाचनले १२ प्रमुख÷उपप्रमुख, अध्यक्ष÷उपाध्यक्ष, १ सय ३ जना वडा अध्यक्ष, १ सय ३ महिला सदस्य, १ सय ३ दलित सदस्य र २ सय ६ खुला सदस्य निर्वाचित गर्नेछ । दलित÷अल्पसंख्यक २७ जना निर्वाचित हुनेछन् ।

शुक्रबार हुने निर्वाचनबाट प्रत्यक्ष रुपमा ५ सय ३९ जनप्रतिनिधि चुनिने छन् । यसरी चुनिएर बन्ने गाउँ÷नगरसभाले दलित/अल्पसंख्यकबाट २७ लाई निर्वाचित गर्ने छ । निर्वाचनबाट ठूलो संख्यामा महिला, दलित र अल्पसंख्यक समुदाय स्थानीय सरकारमा पुग्नेछन् । प्रमुख/उपप्रमुख, अध्यक्ष/उपाध्यक्ष, वडा अध्यक्ष र खुला सदस्यमा प्रतिस्पर्धा गर्ने अवसरसमेत रहेकाले महिला जनप्रतिनिधि २ सय ६ बाट अझै बढ्ने छ । सोही अवसर दलितलाई समेत रहेकाले जनप्रतिनिधिका रुपमा उनीहरुको संख्या पनि बढ्ने देखिन्छ । निर्वाचनले जनप्रतिनिधिका रुपमा जिल्लाका अल्पसंख्यक पहरी, थामी लगायत समुदायको प्रतिनिधित्व सुनिश्चित गरेको छ ।

नगरपालिकातर्फ तीन नगर प्रमुख, तीन उपप्रमुख, ३६ वडाध्यक्ष, ३६ महिला सदस्य, ३६ दलित महिला सदस्य, ७२ खुला सदस्य र नौ दलित/अल्पसंख्यक गरी १ सय ९५ सदस्य जनप्रतिनिधिका रुपमा नगरवासीद्धारा निर्वाचित हुनेछन् । गाउँपालिकातर्फ नौ अध्यक्ष, नौ उपाध्यक्ष, ६७ वडाअध्यक्ष, ६७ महिला सदस्य, ६७ दलित महिला सदस्य, १ सय ३४ खुला सदस्य र १८ जना दलित/अल्पसंख्यकसमेत ३ सय ७१ सदस्य जनप्रतिनिधि चयन हुनेछन् ।

सबैभन्दा बढी १४ वटा वडा रहेको चौतारा साँगाचोकगढी नगरपालिकामा ७५ सदस्यीय जनप्रतिनिधि रहने छन् । सबैभन्दा कम पाँचवटा वडा रहेको भोटेकोसी गाउँपालिकामा २९ सदस्यीय गाउँपालिकासभा रहनेछ । गाउँपालिकातर्फ सबैभन्दाबढी १२ वटा वडा रहेको इन्द्रावती गाउँपालिकामा ६४ जनप्रतिनिधि निर्वाचित हुनेछन् ।

स्थानीय तह निर्वाचन ऐन २०७३ ले नगरपालिकामा एक प्रमुख, एक उपप्रमुख, प्रत्येक वडामा एकवडाध्यक्ष, एक/एक दलित, महिला दलित सदस्य र दुई खुला सदस्य निर्वाचित हुने व्यवस्था गरेको छ । यसरी निर्वाचित हुने नगरसभाले दलित वा अल्पसंख्यक समुदायबाट तीन सदस्य निर्वाचित गर्ने छ ।

त्यस्तै गाउँपालिकामा एक/एक अध्यक्ष, उपाध्यक्ष, प्रत्येक वडाबाट एक वडाध्यक्ष, एक/एक दलित, महिला दलित सदस्य र दुई खुला सदस्य निर्वाचित हुनेछन् । गाउँसभाले गाउँपालिकाभित्रका मतदाताबाट दुईजना दलित वा अल्पसंख्यकलाई सदस्य निर्वाचित गर्नेछ ।
तीन नगरपालिकाका नगरसभामा निर्वाचितमध्ये ६६ जना नगरकार्यकारी हुनेछन् । त्यस्तै गाउँ कार्यकारीमा १ सय २५ सदस्य चयन हुनेछन् । दुबै जोड्दा हुने १ सय ९१ जनप्रतिनिधिले स्थानीय सरकार चलाउने छन् ।