जन्मदिनको अवसरमा विद्यार्थीलाई पोषाक वितरण

चौतारा । आफ्नो जन्मदिनको अवसरमा चौतारा साँगाचोकगढी नगरपालिका– ४ देउरालीमा रहेको श्री कालीकादेवी माध्यमिक विद्यालयको विद्यालय व्यवस्थापन समितिका अध्यक्ष रघुसिं तामाङले विद्यार्थीलाई पोषाक वितरण गरेका छन् ।

४३ वर्ष पूरा गरी ४४ वर्ष प्रवेश गरेको अवसरमा उनले कालीकादेवी माध्यमिक विद्यालयका विपन्न एवम् जेहेन्दार ४४ विद्यार्थीलाई विद्यालय पोषाक वितरण गरेका हुन् । जन्मदिनमा विभिन्न कार्यक्रम गरेर फजुल खर्च गर्नुभन्दा विद्यार्थीलाई सहयोग गर्दा बढी प्रभावकारी हुने भन्दै ५० हजार रुपैंया बराबरको पोषाक विद्यार्थीहरुलाई वितरण गरिएको तामाङले बताए ।

विद्यालयमा एक कार्यक्रम गरी तामाङले प्रदान गरेको पोषाक विद्यार्थीलाई हस्तान्तरण गरिएको हो । १८ वर्षदेखि सो विद्यालयको विद्यालय व्यवस्थापन समितिको नेतृत्व गर्दै आएका तामाङले शिक्षा क्षेत्रको विकासमा नविन सोचका साथ काम गर्दै आएका छन् ।

तामाङकै समन्वय र अगुवाईमा विद्यालयले विद्यार्थीहरुलाई नर्सरीदेखि कक्षा १२ सम्म निःशुल्क शिक्षा प्रदान गर्दै आएको छ । त्यस्तै विद्यार्थीहरुलाई न्यून शुल्कमा आवासीय सेवा समेत प्रदान गरिदै आएको विद्यालय प्रशासनले जनाएको छ । सो विद्यालयमा कक्षा ११ र १२ मा कानुन संकायमो समेत अध्यापन भईरहेको छ ।

तामाङले शिक्षा क्षेत्रमा विशेष योगदान पु¥याएको भन्दै यसअघि चौतारा साँगाचोकगढी नगरपालिकाले दीर्घ सेवा पदक समेत प्रदान गरेको थियो ।