मलको माग गर्दै किसानले बुझाए प्रधानमन्त्रीलाई ज्ञापनपत्र

चौतारा । नेकपा (माओवादी केन्द्र) को भातृ संगठन अखिल नेपाल किसान महासंघ ( क्रान्तिकारी केन्द्र) सिन्धुपाल्चोकले किसानहरुलाई यथासिघ्र सहजरूपमा रासायनिक मल उपलब्ध गराउन माग गर्दै जिल्ला प्रशासन कार्यालय सिन्धुपाल्चोक मार्फत प्रधानमन्त्री तथा मन्त्रीपरिषद्को कार्यालयलाई ज्ञापनपत्र बुझाएको छ ।

किसानलाई सहज रुपमा कृषि सामग्री लिमिटेडले तोकेको मूल्यमा मलको आपूर्ति व्यवस्थाको लागि सरकारलाई महासंघले माग गरेको छ । बुधबार जिल्ला संयोजक दधिराम पराजुलीसहितको टोलीले प्रशासन कार्यालय मार्फत प्रधानमन्त्रीलाई ज्ञापनपत्र बुझाएको हो । चीनबाट आयात भएको मलसमेत तातोपानी भन्सारको गोदाममा थन्किएर बसेको भन्दै महासंघले तातोपानी भन्सारमा थन्किएका मल सिन्धुपाल्चोकलाई पहिलो प्राथमिकतामा राखी तुरुन्त बिक्री वितरण गर्न समेत सरकारको ध्यानाकर्षण गराएको छ ।

‘विगतको जस्तै सरकारले यो वर्ष पनि यो वा त्यो बहाना बनाएर देशभरका किसानलाई रसायनिक मलको चरम अभाव बेहोर्न बाध्य बनाएको छ’, ज्ञापनपत्रमा भनिएको छ– ‘नेपाली किसानले अर्थतन्त्रमा महत्वपूर्ण योगदान पुर्याउने भएपनि किसानको परिश्रमको मूल्य भने पाएका छैनन् । विगतका वर्षमा भएको दुःख दोहोरिने र यस वर्ष विभिन्न बाहानामा झन बढी सास्ती व्यहोर्नुपरेको समयमा नै सरकारले समेत व्यवास्था गरेको कुरा घाम भै छर्लङ्ग हुन्छ देशको अधिकांश भूभागमा मकै तथा तरकारीमा मल हाल्ने र धान रोपाइँको समय भैसक्दा समेत रसायनिक मलको चरम अभाव छ । यो वर्ष मनसुन सक्रिय भएकोले समयमा नै खेती त लगाई तर खेतीमा आवश्यक मल अभावको कारण अहिले किसान सडकसम्म आउन बाध्य भएका छन् मकै, धान तथा अन्य बालीको लागि आवश्यक पर्ने मलको उचित आपूर्ति र भण्डारण गर्नु राज्यको दायित्व हो ।’

ज्ञापनपत्रमा भनिएको छ– ‘चीनबाट आयात भएको भनिएको मल समेत तातोपानी भन्सारको गोदाममा थन्किएर बसेको छ तातोपानी भन्सारमा थन्किएका मल तुरुन्त सिन्धुपाल्चोकलाई पहिलो प्राथमिकतामा राखी बिक्री वितरण गर्न समेत ध्यानाकर्षण गराउन चाहन्छौं । यस सम्बन्धमा सम्बन्धित निकायको ध्यान पुगोस भनि महासंघ अपिल गर्दछ यसर्थ आफ्ना संयन्त्र परिचालन गरी तदारुकताको साथ बजार अनुगमन मार्फत किसानलाई सहज कृषि सामग्री लिमिटेडले तोकेको मूल्यमा मलको आपूर्ति व्यवस्थाको लागि सरकार समक्ष जोडदार माग गर्दछ ।’