जनप्रतिनिधिलाई शिक्षक संघले गर्यो सम्मान

पिस्कर । नेपाल शिक्षक संघ त्रिपुरासुन्दरीले गाउँपालिकमा निर्वाचित जनप्रतिनिधिहरुलाई बधाई तथा सम्मान गरेको छ ।

गाउँपालिका अध्यक्ष भक्तध्वज बोहरा, उपाध्यक्ष गिताकुमारी नेपाल, वडा नं. १ घोर्थलीका वडा अध्यक्ष सिताराम थापा, वडा नं. २ चोकटीका वडा अध्यक्ष रमेश राउत, वडा नं. ३ धुस्कुनका वडा अध्यक्ष शिवकुमार कार्की, वडा नं. ४ पिस्करका वडा अध्यक्ष टेकबहादुर गुभाजु(विजय), वडा नं. ५ तौथलीका वडा अध्यक्ष यादव श्रेष्ठ, वडा नं. ६ टेकानपुरका वडा अध्यक्ष रमेश बोहरालाई संघले सम्मान गरेको हो ।

कार्यक्रममा पालिका अध्यक्ष बोहराले शिक्षा क्षेत्रको गुणस्तर सुधार गर्न सबै लाग्नुपर्ने बताए । गाउँपालिकाको विकासको लागि आफू रातदिन नभनि लाग्ने र सबैलाई त्यसरी नै लाग्दै सहयोग गर्न अनुरोध गरे । त्रिपुरासुन्दरी गाउँपालिकाले सरकारले तोकेको विद्यालय कर्मचारीको न्यूनतम तलब समेत नदिएकोले देखिएकोले तलब दिनको लागि आफू लाग्ने बताए । राजनीतिक प्रतिशोधको भावना राखी काम नगर्ने बताउँदै अध्यक्ष बोहोराले हिजो पार्टीको भएको तर अब साझा भएर काम गर्ने जनाए ।

शिक्षक संघ त्रिपुराको सचिव बलराम नेपालले सञ्चालन गरेको कार्यक्रम शिक्षक संघ त्रिपुराको अध्यक्ष तेजबहादुर बस्नेतको सभाध्यक्षतामा भएको थियो । कार्यक्रम सिद्धीकाली आधारभूत विद्यालयमा गरिएको शिक्षक महासंघ त्रिपुराको सदस्य रामनन्दन शाहले बताए ।

त्यसैगरी सुनकोशी समाज त्रिपुरासुन्दरी– ३ धुस्कुनले पनि पालिकाबाट निर्वाचित जनप्रतिनिधिहरुलाई बधाई तथा शुभकामना दिएको छ । एक कार्यक्रम गरी जनप्रतिनिधिहरुलाई बधाई तथा शुभकामना प्रदान गरिएको सुनकोशी समाजको रुजन श्रेष्ठले बताए । सुनकोसी समाजले शिक्षा, स्वास्थ लगायत मानवीय सेवा गर्दै आएको समाजको अध्यक्ष कल्पना श्रेष्ठले बताइन् ।