आफ्नै प्रतिबद्धताको खिलाफमा जनप्रतिनिधिः नजर सुविधामा मात्रै

चौतारा । जनप्रतिनिधिलाई ‘चुनावको बेला थुप्रै आस्वासन बाँड्ने र चुनाव जितेपछि आफूले बाँडेका आश्वासन र मतदातासँग गरेको प्रतिबद्धता भुल्ने’ आरोप लाग्ने गरेको छ ।

त्यो आरोपलाई सिन्धुपाल्चोकको चौतारा साँगाचोकगढी नगरपालिकाका जनप्रतिनिधिहरुले पुस्ट्याई गरिदिएका छन् । स्थानीय निर्वाचन २०७९ मा ३१ पृष्ठको प्रतिबद्धता पत्र जारी गर्दै चुनावमा होमिएको नेकपा (माओवादी केन्द्र) र नेकपा (एकीकृत समाजवादी) का उम्मेद्वारहरुले चुनाव जितेको २ महिना नबित्दै आफैंले गरेको प्रतिबद्धताको खिलाफमा उभिएका छन् ।

नेकपा (माओवादी केन्द्र)बाट नगर प्रमुखको उम्मेद्वार बनेका कृष्णप्रसाद सापकोटाले मतदाताहरु समक्ष गरेको प्रतिबद्धतालाई विश्वास गर्दै ११ हजार ७२ मतदाताले आफ्नो मत दिई विजयी गराएका थिए । त्यस्तै नेकपा (एकीकृत समाजवादी) बाट उपप्रमुखको उम्मेद्वार बनेकी सीता थापालाई ९ हजार ७ सय २६ मत दिई विजयी गराएका थिए ।

तर उनीहरुले चुनावको बेलामा गरेको प्रतिबद्धतालाई वेवास्था गरी आफ्नो सुविधा मात्रै उपभोग गर्न थालेको आरोप लाग्न थालेको छ । ‘चुनावको बेला कृषि, शिक्षा, स्वास्थ्य, रोजगारजस्ता क्षेत्रमा आमूल परिवर्तन गरी सबैलाई स्वरोजगार बनाउछु भनेका थिए, यिनीहरुले केहि गर्छन् कि जस्तो लागेर भोट हाल्यौं’, चौतारा साँगाचोकगढी नगरपालिका– १ का एक मतदाताले भने– ‘तर यो कार्यकालको पहिलो नीति तथा कार्यक्रमले हाम्रो आशामा पानी खन्याईदियो, ‘जुन जोगी आएपनि कानै चिरेको’ जस्तो देखियो ।’

कृषि, शिक्षा, स्वास्थ्य, रोजगारजस्ता महत्वपूर्ण विषयमा जनप्रतिनिधिहरुले चासो नदिएको उनले बताए । ‘पूर्ण रुपमा लागु गरेको भए अहिलेको नीति तथा कार्यक्रम भन्दा त पुरानै नीति कार्यक्रम जनमुखी थियो’, उनले भने– ‘अहिले त आफूमात्रै सुविधा भोग गर्ने, आफू ठेकेदार बन्न डोजर खरिद गर्नेजस्ता कुरा पो समेटिएछ । अरुलाई के दोष दिनु, यस्तालाई चुनाव जिताउने हामी नै उस्तो नि ।’

हुन पनि गणतन्त्र पक्षधरलाई जिताऔं भन्दै चुनाव अघि सार्वजनिक गरिएको प्रतिबद्धता–पत्रमा उनीहरुले आधुनिक तथा दिगो कृषिः किसानको समृद्धि, शिक्षा प्रणालीमा आमूल परिवर्तनः गुणस्तरीय शिक्षाको आधार, स्वास्थ्यमा आम नागरिकको पहुँचः स्वस्थ समाज निर्माणको आधार, दिगो तथा वातावरणमैत्री पूर्वाधार विकासको मूल आधार, आर्थिक–भौतिक र सामाजिक सुरक्षाः नगर सुशासनको आधार, वैज्ञानिक बन व्यवस्थापनः स्थानीय रोजगार तथा आर्थिक समृद्धि, जलवायुजन्य प्रकोपको आंकलन तथा तयारीः जोखिमको न्यूनिकरण, स्थानीय मानवस्रोतको विकासः समग्र समृद्धिको आधार, प्राकृतिक तथा शैक्षिक पर्यटनस्थलको विकासः स्थानीय रोजगारमा योगदान, खेलकुद र संरचनामा लगानीः युवाको विकास र नगरको पहिचान, परम्परागत कला संस्कृतिको प्रबद्र्धनः इतिहास र पहिचानको संरक्षण, सूचना र प्रविधिमा पहुँचः पारदर्शीता र सुशासन सुनिश्चितता, सहकार्यमा जोडः स्रोतमा पहुँच र कामको प्रभावकारितामा बृद्धि, लैंगिक तथा समावेशीकरणको विस्तारः सामाजिक न्यायमा अभिबृद्धि, बजारीकरण र नीजि क्षेत्रको संलग्नताः स्थानीय उत्पादनको मुनाफामा बृद्धि, आत्मनिर्भर अर्थतन्त्रको विकासः समाजवादको आधारजस्ता नीतिमा रही २ सय २६ बटा बुँदा सार्वजनिक गरेका थिए ।

प्रतिबद्धता पत्रमा उल्लेख गरिएका ती बुँदाहरु नगरपालिकाले सार्वजनिक गरेको आर्थिक वर्ष ०७९/८० को नीति तथा कार्यक्रममा ५ प्रतिशत पनि समावेश छैन । ‘ठूलै चुनौतिको बीच आएका हाम्रा जनप्रतिनिधिहरुले प्रतिबद्धतापत्र अनुरुप काम गर्छन् भन्ने थियो, तर त्यस्तो देखिएन’, चुनावको समयमा प्रतिबद्धता पत्र लेखनमा सक्रिय भूमिका निभाएका एक सदस्यले भने– ‘हामीले उहाँहरुले के के गर्न सक्नुहुन्छ भनेर बृहत छलफल गरी नै प्रतिबद्धता पत्र तयार पारेका थियौं । प्रतिबद्धता पत्रमा समेटिएका बुँदाहरु नीति तथा कार्यक्रममा समेट्न नसकेको देख्दा दुःख लाग्यो ।’

आफूलाई मत दिएर जिताएका जनताको हित अनुकुल जनमुखी बजेट ल्याउनुपर्नेमा त्यसो हुन सककेको उनले बताए । ‘१ अर्ब २४ करोड रुपैंया भनेको सानो बजेट हैन, यो रकम योजनाबद्ध रुपमा सहि सदुपयोग गर्ने हो भने ५ वर्षमा नगरका सबै सक्षम व्यक्तिहरु रोजगार हुनेछन्, विकासले कायापलट रुप लिन्छ’, उनले भने– ‘तर सरसर्ति नीति तथा कार्यक्रम हेर्दा त्यसो हुने छाँटकाँछ छैन, कर्मचारीले खेलाएका कारण हो या आफ्नो ‘भीजन’नै नभएर हो जनताको पक्षमा कुनै ठोस नीति आएको देखिएन ।’