तालिम, गोष्ठी र बैठकमै १ करोड सकाउँदै चौतारा साँगाचोकगढी

चौतारा । समृद्धिका लागि आयमूलक क्षेत्र र जीविकोपार्जन क्षेत्रमा ठूलो लगानी गर्नुपर्ने आवश्यकता छ । स्थानीय सरकारसँग नागरिकको अपेक्षा र माग पनि विद्युत, खानेपानी, सिँचाइ, कृषि, मल, साना उद्योग लगायतका क्षेत्रको विकासमा छ ।

तर, सिन्धुपाल्चोकको चौतारा साँगाचोकगढी नगरपालिकाले भने स्थानीय सरकारसँग नागरिकको अपेक्षा र मागलाई वेवास्था गर्दै आर्थिक वर्ष २०७९/०८० को लागि तालिम, गोष्ठी र बैठकजस्ता फजुल खर्चमा मात्रै १ करोड भन्दा बढी रुपैंया विनियोजन गरेको छ । नगरपालिकाले सार्वजनिक गरेको आर्थिक वर्ष २०७९/०८० को शाखागत बजेट, योजना तथा कार्यक्रममा उल्लेख भए अनुसार एक आर्थिक वर्षको लागि तालिम, गोष्ठी र बैठकमा १ करोड ५० हजार रुपैंया विनियोजन गरिएको हो । यो अघिल्लो आर्थिक वर्ष २०७८/०७९ को तुलनामा २ सय ३१ प्रतिशत बढी हो । अघिल्लो आर्थिक वर्षमा यी शीर्षकमा जम्मा गत वर्ष ४३ लाख ५० हजार रुपैंया मात्रै विनियोजन गरिएको थियो ।

नगरपालिकाले विनियोजन गरेको शाखागत बजेटमध्ये सबै भन्दा बढी तालिम, गोष्ठी र बैठकमा खर्च गर्न शिक्षा शाखा अग्रसर देखिन्छ । शिक्षा शाखाले ४ करोड १५ लाख बजेट मध्ये तालिम, गोष्ठी र बैठकमा ३७ लाख विनियोजन गरेको छ । जसमा आधारभूत शिक्षकहरुको लागि कम्युटर तालिमका लागि ५ लाख, प्रधानाध्यापक बैठक तथा गोष्ठीका लागि ५ लाख, बालबालिका सहजकर्ताहरुलाई मन्टेश्वरी तालिम ७ लाख, माध्यमिक तहको शिक्षकहरुको लागि विषयगत तालिम ५ लाख, पाठ्यपुस्तक पुनरावलोकन तथा समिक्षा गोष्ठी १ लाख, आधारभूत तहको प्रधानाध्यापकहरुको नेतृत्व विकास तालिम १ लाख ५० हजार, माध्यमिक शिक्षकहरुको लागि विषयत बैठक २ लाख ५० हजार, बैठक भत्ता ३ लाख, आधारभूत तह शिक्षकका लागि अंग्रेजी तालिम ५ लाख, इएमआईएस/एसआईपी अध्यावधिक तालिमका लागि २ लाख खर्चिने भएको हो ।

त्यस्तै स्वास्थ्य तर्फ ३ करोड ५० लाख बजेटमा ३१ लाख ५० हजार तालिम, गोष्ठी र बैठकको लागि छुट्याईएको छ । वार्षिक, अर्धवार्षिक समिक्षाका लागि ५ लाख, मासिक समिक्षा गोष्ठीमा ५ लाख, आरआरटीलाई तालिम १ लाख, स्वास्थ्यकर्मीलाई क्षमता अभिबृद्धि तालिम ५ लाख, महिला स्वयम्सवीकालाई तालिम ४ लाख ५० हजार, आमा समूह बैठक तथा खाजा खर्च ११ लाख गरी कुल ३१ लाख ५० हजार रुपैंया तालिम, गोष्ठी र बैठकको लागि छुट्याईएको हो ।

न्यायिक समितितर्फ भने विनियोजित बजेटको ७५ प्रतिशत नै तालिम र भ्रमणको लागि छुट्याईएको छ । कुल १० लाख विनियोजित बजेट मध्ये मेलमिलापकर्ता र न्यायिक समितिको पदाधिकारीहरुको क्षमता विकास तालिम ४ लाख, अध्ययन भ्रमण ३ लाख ५० हजार गरी ७ लाख ५० हजार खर्च गरिने भएको हो ।

त्यस्तै, होमस्टे सञ्चालन तालिम, अवलोकन भ्रमणका लागि २ लाख ५० हजार, लैङ्गिक हिंसा न्यूनिकरणको लागि पुरुष सहभागिता अभिमुखिकरणका लागि २ लाख, महिला समूह गठन÷पुर्नगठन, अनुशिक्षणका लागि २ लाख, नगर तथा वडा स्तरीय दलित समन्वय समिति परिचालन बैठकका लागि २ लाख, नेतृत्व विकास तथा सशक्तिकरण तालिमका लागि ३ लाख, बालसञ्जाल भेला तथा अभिमुखीकरणका लागि २ लाख, कृषि तालिम तथा गोष्ठीका लागि ५ लाख, पशु सेवा तालिम, गोष्ठी, अध्ययन भ्रमणका लागि ५ लाख, सामुदायिक तथा कवुलियती बन समूहको समिक्षा तथा योजना तर्जुमा गोष्ठीका लागि १ लाख छुट्याईएको छ ।

यस्ता फजुल र अनुत्पादक खर्चले विकासलाई बाधा पारेको छ । करोडौंको खर्चबाट हुने क्षमता अभिवृद्धि, सेवा प्रवाह र जनचेतना वृद्धिमा कति प्रगति भयो भन्ने चाहिँ अनुत्तरित छ । बग्रेल्ती तालिम, गोष्ठी सरकारी रकम सिध्याउने कारक बनेका छन् । यस्ता काममा जनप्रतिनिधिनै अग्रसर हुनुले ‘गाउँगाउँमा सिंहदरबार’ को नाममा ‘गाउँ गाउँमा छोटे राजा’ पसेको भान भईरहेको स्थानीय नागरिकहरुले भन्दै आएका छन् ।

हेर्नुस् चौतारा साँगाचोकगढी नगरपालिकाले सार्वजनिक गरेको आर्थिक वर्ष २०७९/०८० को शाखागत बजेट, योजना तथा कार्यक्रम