जनताको सारथी बन्दै, बलेफी गाउँपालिकाका अध्यक्ष गंगाबहादुर तामाङ

पाँच वर्षयता दिनभर हिँडेर बलेफीस्थित एनआइसी एसिया बैंक पुग्ने वडा नम्बर ४ अदमाराकी एक सय तीन वर्षीया वृद्धा विष्णुमाया खत्रीको घरमा गएर सामाजिक सुरक्षाभत्ता बलेफी गाउँपालिकाका अध्यक्ष गंगाबहादुर तामाङले घरमै गएर दिएका छन्।

बलेफी गाउँपालिका अध्यक्ष गंगाबहादुर तामाङले हातमा भत्ता थमाइदिँदा उनको अनुहारमा खुसीको सीमा थिएन । घरमै भत्ता पाएपछि विष्णुमायाले हाँस्दै भनिन्, ‘सिंहदरबार गाउँमा आएको भन्थे हो रहेछ ।’

व्यक्तिको मृत्युपछि पनि कागजात मिलाएर वृद्धाभत्ता हिनामिना गरेको पाइएपछि सरकारले खाता प्रणाली लागू गर्‍यो । तर, ज्येष्ठ नागरिकले सास्ती भोग्दै आएका छन् । टाढाबाट हिँडेर बैंक पुग्दा पनि दिनभर लाइनमा उभिनुपर्ने विवशताले स्थानीय तह गठनपछि ज्येष्ठ नागरिकले हैरानी व्यहोर्दै आएका हुन् ।

ज्येष्ठ नागरिकले पाएको दुःखको सुनुवाइ गर्दै बलेफी गाउँपालिकाले अबदेखि हिँड्न नसक्नेलाई घरमै पुगेर भत्ता दिने अभियानको सुरुवात गरेको छ ।

‘वृद्धवृद्धा र अशक्तलाई घरमै र अरूलाई पनि गाउँको चोकचोकबाट सामाजिक सुरक्षाभत्ता वितरण गर्ने व्यवस्था मिलाएका छौँ,’ गाउँपालिका अध्यक्ष तामाङले भने भत्ता वितरणका लागि सम्बन्धित बैंकका कर्मचारी, जनप्रतिनिधि र नेपाल प्रहरीको संयुक्त टोली गाउँगाउँ जाने योजना बनाइएको छ ।

वडा नं. ४ बाट सुरु गरिएको अभियान यो वर्ष पाँच वडामा लागू हुने उनले बताए । १, २ र ३ नम्बर वडाका स्थानीयले जलवीरेस्थित राष्ट्रिय वाणिज्य बैंकबाट भत्ता लिँदै आएका छन्।