जुगल गाउँपालिका अध्यक्षद्वारा सामाजिक सञ्जालको दुरुपयोग नगर्न आग्रह

ढाडे:जुगल गाउँपालिकाद्वारा सामाजिक सञ्जालको दुरुपयोग नगर्न जनप्रतिनिधि, सबै कर्मचारी,शिक्षकहरुलाई आग्रह गरेको छ ।

सामाजिक सञ्जालको दुरुपयोग गरी अमर्यादित कार्य गर्ने, चरित्र हत्या गर्ने उद्देश्यले सामाजिक सञ्जालमा सामग्री बनाई प्रकाशन प्रसारण नगर्न तथा नगराउन जुगल गाउँपालिका अध्यक्ष रेशम स्याङबोले आग्रह गरेको हो ।

वर्तमान समयमा सामाजिक सञ्जालहरुको विस्तार र प्रयोग अत्याधिक मात्रामा भइरहेको हामी सबैलाई सर्वविदितै छ । विज्ञान र प्रविधिको विकास र विस्तारवाट समाजलाई अलग्याउने कुरा समय सान्दर्भिक नहुने कुरामा दुई मत छैन ।

सामाजिक सञ्जालको समुचित प्रयोग गरी जनजीवन सरल र सहज बनाउनु आजको आवश्यकता देखिन्छ तर सामाजिक सञ्जालहरुको दुरुपयोग गरी समाजमा विखण्डन निम्त्याउन सक्ने, विरोधको लागि विरोध देखिने, समाजमा खल्लो पुयाउने खालको कुनैपनि क्रियाकलाप प्रति समाजका सवै नागरिकहरु सजग हुनुपर्ने देखिन्छ ।

साथसाथै सामाजिक पदधारण गरेका व्याक्तिहरु त झनै यसप्रति निकै सजग हुनुपर्ने कुरा विभिन्न ऐन, नियम तथा नियमावलीहरुमा उल्लेख छ र सार्वजनिक पद धारण गरेका व्याक्तिहरुवाट आचरण उल्लङ्घन भएको पाइएमा नियमानुसार कानुनी कारवाही हुने व्यवस्था छ।

यसै परिप्रेक्ष्यमा यस जुगल गाउँपालिकामा पनि सामाजिक सञ्जालको प्रयोगका कारण सामाजिक भेष, समाजमा विखण्डन, सरकारको विरोध, सामाजिक विभाजनको स्थिति नआउला भन्न सकिन्न । त्यसैले सामाजिक पद धारण गरेका कुनैपनि जनप्रतिनिधि, कर्मचारी, शिक्षक लगायतका व्यक्तिहरुले सामाजिक सञ्जालमा ऐन कानुनको बर्खिलाप हुने कुनै पनि टिकाटिप्पणी नगर्न नगराउनुहुन सम्बन्धित सवैमा जानकारी गराइन्छ ।

यदि सार्वजनिक पद धारण गरेका कुनैपनि जनप्रतिनिधि, शिक्षक वा कर्मचारीले आचरण विपरितका कार्य तथा टिकाटिप्पणी गरेको पाइएमा हाल प्रचलित कानुन बमोजिमको कारवाही हुने व्यहोरा सम्वन्धित सवैमा पत्र मार्फत जानकारी दिएका छन्।