सिन्धुमा बाढी पहिरोको वितण्डा (कहाँ के के भयो, अपडेट र तस्वीरहरू)

चौतारा । लगातार तीनदिनदेखि परेको अविरल वर्षका कारण सिन्धुपाल्चोकको जनजीवन कष्टकर बनेको छ । बाढी र पहिरोको त्रासले सिन्धुबासी चिन्तित छन् ।

चौतारा साँगचोकगढी नगरपालिका– १३ ठूलोसिरुवारीको जङ्गलछापमा पहिरो जाँदा दुई घरमा क्षति पुगेको छ । सोमबार राती पानीसँगै गएको पहिरोका कारण १२ घर उच्च जोखिममा परेको छ । ‘अत्याधिक वर्षाका कारणले गर्दा स्याउली टोलको बस्तीमा पहिरो आई जंगलछापमा रहेको घना बस्ती नै जोखिममा परेको छ’, स्थानीय सागर श्रेष्ठले भने– ‘जोखिममा रहेका स्थानीयलाई सुरक्षित स्थानमा स्थानन्तरण नगरिए यसले ठूलो विपद् ल्याउने देखिन्छ । वर्षाको कारण घरहरु पुरेको र पार्किङमा राखेको गाडी समेत बगाएको उनले बताए ।

चौतारा साँगाचोकगढी वडा नम्बर १० को हर्रेमा अविरल बर्षाका कारण काँडे, हर्रे डाँडा र विमरेनी बस्ती उच्च जोखिममा परेको स्थानीयले जानकारी दिएका छन् । पहिरोले बन्देउ चौतारा सडक समेतअबरुद्ध भएको छ । अहिले एक तर्फी सडक खलाईएको र दुई तर्फ खुलाउने कार्य भै रहेको जिल्ला प्रहरी कार्यालय सिन्धुपाल्चोकका सूचना अधिकारी प्रहरी नायव उपरीक्षक दक्षकुमार बस्नेतले जानकारी दिए ।

त्यस्तै चौतारा साँगाचोकगढी नगरपालिका वडा नम्बर ९ र १० को सीमा सुकुटे बजार नजिकै घुमाउने भन्ने स्थानमा स्थानीय अधेंरी खोला गाउँमा पस्दा स्थानीयको घर, टहरामा क्षति पुगेको छ । दुबै वडाको तीन/तीन वटा घर क्षति भएको छ । धानबालीमा समेत क्षति पुगेको स्थानीयले बताएका छन् ।

पहिरोका कारण सिन्धुपाल्चोकका दुई दर्जन बढी बस्ती उच्च जोखिममा परेका छन् । पहिरोले यो वर्ष मेलम्ची नगरपालिका– २ निबुगाउँका १६ घर उच्च जोखिममा पारेको छ । साउन २० गते घरमूनिको पहिरोले निबुगाउँलाई उच्च जोखिममा बनाएपछि मेलम्ची नगरपालिकाले सुरक्षित स्थानमा टेण्ट हालेर राखिएको मेयर आइतमान तामाङले जानकारी दिए ।

हेलम्बु गाउँपालिका– ५ सिरिसेका १० घर पहिरोले उच्च जोखिममा पारेको छ । उक्त घरहरुलाई सुरक्षित स्थानमा सारिने सो गाउँपालिका अध्यक्ष निमाग्याल्जेन शेर्पाले बताए । बाह्रबिसे नगरपालिका –९ राम्चेको डाँडाबिसौनाका चार घर जोखिममा पारेको छ । उक्त घरहरुलाई सुरक्षितका लागि नगर र जनप्रतिनिधि काम गरिरहेको मेयर बालकृष्ण बस्नेतले जानकारी दिए ।

त्यस्तै जुगल गाउँपालिका– ५ मगरनाम्सा गाउँमा पहिरोले नौ घर उच्च जोखिममा पारेको छ । सो गाउँपालिकाका अध्यक्ष रेशम स्या्ङबोले उक्त बस्तीलाई सुरक्षित स्थानमा सारिने काम थालिएको बताए ।

लगातारको वर्षाले हेलम्बु राजमार्गको विभिन्न स्थानमा पहिरो जाँदा सिपाघाट–मेलम्ची यातायातसेवा अवरुद्ध भएको छ । सिपाघाट–मेलम्ची सडक खण्ड अन्तर्गत विभिन्न ४ ठाउँमा पहिरो गएर यातायात अबरुद्ध भएको हो । जाल्पा क्रसर, रवि क्रसर, लामा क्रसर र रातो पहिरोमा पहिरो गएको ईलाका प्रहरी कार्यालय मेलम्चीले जनाएको छ ।

अबिरल वर्षाको कारण सिन्धुपाल्चोकको विभिन्न ठाउँमा बाढी र पहिरोले स्थानीय डर त्रासले आक्रन्त रहेको भन्दै नेकपा (एमाले) बागमती प्रदेश सदस्यमा सुरेश रानाले स्थानीय सरकार र सरोकार सम्बन्धित निकायलाई राहत र उद्वारमा लाग्न पनि अपिल गरेका छन् । केहि जनप्रतिनिधि विपद् स्थलमा पुगि पीडितको पीडामा दर्शकमात्रै बन्ने काम गरिरहेको भन्दै उनले तत्काल राहत र उद्दारमा नलाग्ने हो भने जनप्रतिनिधिको महसुस नहुने बताए ।

त्यस्तै चौतारा साँगाचोकगढी नगरपालिका– ९ का पूर्व अध्यक्ष विष्णु लामाले जल्किनी–भैसे मोटर बाटो क्षतविक्षत भएको भन्दै सो बाटोको अबरोध शीघ्र हटाउन र जोखिममा रहेका घर बस्तीको ब्यवस्थापनको लागि अपिल गरेका छन् ।

हेर्नुस् तस्वीरमा बाढी पहिरोको वितण्डाः