हाइड्रोको काम बन्द गर्न स्थानीयलाई पालिका अध्यक्षको निर्देशन

गुम्बा । सिन्धुपाल्चोकको जुगल गाउँपालिका– ३ गुम्बामा निर्माणाधीन ३५ मेगावाटको सीता हाइड्रोपावरको लापरबाहीका कारण खेती योग्य जमिन, सडकलगायतका संरचनामा पहिरो गएको भन्दै काम बन्द गर्न गाउँपालिका अध्यक्ष रेशम स्याङ्बोले स्थानीयलाई निर्देशन दिएका छन् ।

स्थानीयले हाइड्रोका कारण बस्तीनै जोखिममा परेको उजुरी पालिकामा दिएपछि अध्यक्ष स्याङ्बोले अनैतिक काम गर्ने हाईड्रोपावरको काम रोक्न निर्देशन दिएका हुन् । विपद् निम्त्याउन नहुने र स्थानीयको माग बमोजिम हाईड्रोपावरले सम्बोधन पर्नुपर्ने उनको भनाई छ । ‘लापर्वाहिपूर्ण काम नगर्न हाईड्रोपावरलाई पनि सचेत गराएको छु’, उनले भने– ‘हाईड्रोपावरले मनोमानी ढंगले काम गरे उसले सञ्चालन गरेको कामनै बन्द गर्न स्थानीयलाई निर्देशन गरेको छु ।’

उनले प्रशासनलाई पनि यो समस्याबारे पत्र काटेको बताए । इलाका प्रहरी कार्यलय जलबिरेले पत्र प्राप्त भएको जानकारी दिदै पालिका अध्यक्ष, उपाध्यक्ष, हाइड्रोपावर संचालक र स्थानीयलाई भेला गराई समस्या समाधान गराउन लागि परेको जनाएको छ ।

सीता हाइड्रोपावरले भिरालो जमिनमा अव्यवस्थित ढंगले जथाभावी ट्रयाक खोलेर पहिरोको जोखिम बढेको स्थानीयले बताएका छन् । ‘अहिलेसम्म स्थानीयले जग्गाको मुआब्जा समेत पाएका छैनन्, हाम्रो हितमा हाइड्रोले केहि काम पनि गरेको छैन’, स्थानीय लामा कान्छाले भने– ‘उल्टै जथाभावि बाटो खन्दा हाम्रो बस्तीनै जोखिममा परेको छ ।’

पाखाभित्ता हाइड्रोले जताततै बाटो खन्दा गुम्बाको माथिल्लो बस्तीहरु गुम्बा, क्याङ्सिङ, तेम्बाथान, दिप्पु, तेघामा पहिरोको जोखिम बढेको उनको भनाई छ । स्थानीयलाई पहिरोको बाटोबाट आवातजावत गर्न जोखिम भएको लामाले बताए । ‘जताततै पहिरो गाएको छ,’ उनले भने– ‘भोलीको दिनमा पहिरोका कारण स्थानीयलाई केही भयो भने हाइड्रोपावर जवाफदेही हुनु पर्दछ ।’ उनले पटक पटक सीता हाइड्रोपावर प्रालिको सञ्चालक सीताराम तिमल्सिना यसबारे गुनासो गर्दा वेवास्था गरेको उनले बताए ।