असोज २३ गते मनोनयन दर्ता, २६ गते चुनाव चिन्ह दिईने

चौतारा । निर्वाचन आयोगले आगामी ४ मंसिर गते हुने प्रतिनिधिसभा र प्रदेशसभा निर्वाचनको कार्यतालिका सार्वजनिक गरेको छ ।

आयोगका अनुसार दसैंको कोजाग्रत पूर्णिमा अर्थात आगामी २३ असोज का दिन निर्वाचनका लागि उम्मेदवारको मनोनयन दर्ता हुनेछ । निर्वाचन आयोगले सार्वजनिक गरेको तालिका अनुसार टीकाको ४ दिनपछि अर्थात कोजाग्रत पूर्णिमाको दिन देशभर उम्मेदवारी दर्ता हुनेछ ।

दसैंको लामो विदापछि असोज २३ गते आइतबार नै कार्यालय खुल्नेछ । त्यस्तै २४ असोजमा उम्मेदवारको विरोधमा उजुरी दिने, २४ र २५ असोजमा उजुरीमाथि जाँचबुझ गरी निर्णय गर्ने र २५ गते नामावली प्रकाशन हुनेछ । २६ असोजमा उम्मेदवारले नाम फिर्ताको समय पाउनेछन् भने अन्तिम नामावली पनि त्यसै दिन प्रकाशन हुनेछ । निर्वाचन आयोगले समानुपातिक पद्धतितर्फको उम्मेदवारको बन्द सूची बुझाउने समय २ असोजलाई तोकेको छ ।

प्रतिनिधिसभा र प्रदेशसभा सदस्यकोसमानुपातिक निर्वाचन प्रणाली तर्फको बन्द सूचीमा नाम समावेश भएको व्यक्तिले प्रत्यक्षतर्फ भने उम्मेदवार हुन पाउने छैनन् । असोज २६ गते चुनाव चिह्न पनि पाउने आयोगका सहायक प्रवक्ता सूर्यप्रसाद अर्यालले जानकारी दिएका छन् ।