मुक्तक मञ्च सिन्धुपाल्चोकको अध्यक्षमा शिरीष

चौतारा । मुक्तक मञ्च सिन्धुपाल्चोकको अध्यक्षमा लेखक एवम् पत्रकार सुन्दर शिरीष निर्विरोध चयन भएका छन् ।

शब्द सारथिको सहकार्यमा मुक्तक मञ्चद्वारा गरिएको शाखा गठन एवम् मुक्तक बाचन कार्यक्रमको बीच कार्यसमिति निर्माण गरिएको हो । मुक्तक मञ्च सिन्धुपाल्चोको उपाध्यक्षमा रमेश श्रेष्ठ, सचिवमा रस्मिला खत्री, सह–सचिवमा रुपक पुरी र सदस्यहरुमा मेनुका कटुवाल, दुर्गा श्रेष्ठ, यमराज विक रहेका छन् । दुई सदस्य पहिलो बैठकबाट थप गर्ने गरी कार्यसमिति बनाईएको अध्यक्ष सुन्दर शिरीषले बताए ।

निर्वाचित कार्यसमितिलाई मुक्तक मञ्चका केन्द्रिय अध्यक्ष रामजीप्रसाद आचार्य, काठमाण्डौ शाखाका अध्यक्ष राजेन्द्र घिमिरे, शब्द सारथिका अध्यक्ष अमित घिमिरेलगायतले खादा, टीकाद्वारा बधाई दिएका थिए । ‘मुक्तक साहित्य भित्रको छोटो र मीठो विधा भएकोले यसको विकासमा लाग्न जरुरी छ’, कार्यसमितिलाई बधाई ज्ञापन गर्दै मुक्तक मञ्चका केन्द्रिय अध्यक्ष रामजीप्रसाद आचार्यले भने– ‘यो विधा पाठ्यक्रममा पनि समेटिएकाले यसको द्रुत विकासमा हामी सबै जुट्नु पर्छ ।’ मुक्तक मञ्च सिन्धुपाल्चोकले मुक्तकको विकासमा एउटा ईटा थप्ने आचार्यले विश्वास व्यक्त गरे ।

कार्यक्रममा शब्द सारथिको अध्यक्ष अमित घिमिरेले सिन्धुपाल्चोकमा मुक्तक विधा साहित्यको अन्य विधाजस्तो फस्टाउन नसकेको बताउँदै यो समितिले मुक्तकका स्रष्टा र कृति जन्माउन प्रोत्सहान गर्नुपर्नेमा जोड दिए । ‘सिन्धुपाल्चोकमा मुक्तक खासै लेखिएको पाईदैन तसर्थ यो कार्यसमितिले सिन्धु मुक्तकलाई उठाउन प्रयत्न गर्न जरुरी छ’, उनले भने– ‘साथ सहयोगको लागि हामी सदैव तत्पर छौं ।’

सो कार्यक्रममा शब्द सारथिको १४२औं सुन्ने सुनाउने शृङ्खला गरिएको थियो । मुक्तक विशेष सो शृङ्खलामा सिन्धुपाल्चोकबाट पहिलो मुक्तकको कृति प्रकाशन गर्ने जीवन श्रेष्ठलगायत दर्जन बढी स्रष्टाहरुले मुक्तक वाचन गरेका थिए ।