तातोपानी नाकाबाट भित्रियो केही कन्टेनर

चौतारा । चीनको स्वशासित क्षेत्र तिब्बतका विभिन्न शहरमा कोरानाको कारण ८ अगस्टदेखि लगाइएको लकडाउन खुकुलो भएसँगै तिब्बतमा रोकिएको दशैँका सामानहरु भित्रन थालेको छ ।

एक महिनापछि चीनले तातोपानी नाकाबाट आईतबार सामान नेपाल पठाएको छ । चीनतर्फ रोकिएको लसुनसहितका सामान बोकेका केही कन्टेनर नेपालतर्फ पठाएको तातोपानी भन्सार कार्यालयले जनाएको छ । सिन्धुपाल्चोकका प्रमुख जिल्ला अधिकारी वेदनिधि खनालका अनुसार चीनले नियमित रुपमा नै नाका खुलाएको हो वा हैन भन्नेबारे अन्योल रहेको बताए ।

‘केही ट्रक सामान आएका छन्, यो नियमित हुन्छ कि हुँदैन भनेर चिनियाँ पक्षसँग छलफल गरौं भनेको छु,’ उनले भने, ‘अहिलेसम्म नाका खुलेको हो वा हैन भन्ने यकिन छैन । गत २५ साउनमा चीनले नेपालतर्फका दुवै स्थल नाका बन्द गरेको थियो । चीनको तिब्बत क्षेत्रमा कोभिड–१९ संक्रमण बढेको भन्दै तातोपानी र रसुवागढी नाका चिनियाँहरुले बन्द गरेका थिए । दसैँलगायत चाडबाडलक्षित सामान तिब्बत क्षेत्रमै रोकिएका छन् । झन्डै ५० कन्टेनर स्याउ कुहिने अवस्थामा पुगेको बताइएको छ । नेपालका लागि स्याउ ल्याउने व्यापारी सबै चिनियाँ नै हुन् । त्यसैले चिनियाँ व्यापारीले सुरक्षा सावधानी अपनाएर भए पनि उत्तरी नाका खुलाउन सरकारलाई दबाब दिइरहेका छन् ।

चीनबाट आउने सामानहरुको आपूर्ति कमजोर हुँदा बजारमा मूल्य बढेको छ भने बजारमा कतिपय वस्तुको अभाव सुरु भएको छ । चीनमा रहेको नेपाली दुतावासको पहली कदमले केहि कन्टेर भएपनि भित्रिएको भोटेकोशी चेम्बर अफ कमर्शका अध्यक्ष फुनु शेर्पा बताउँछन् । उनका अनुसार करिब एक सय कन्टेनर खासा नाकामा रोकिएका छन् ।

आईतबार सिन्धुपाल्चोक उद्योग बाणिज्य संघ र नेपाल हिमालय सीमापार बाणिज्य संघका पदाधिकारी र व्यवसायीहरुले परराष्ट्रमन्त्री डा. नारायण खड्कालाई तातोपानी नाका खोल्न आईतबार ज्ञापनपत्रसमेत बुझाएका थिए । उनीहरुले नाका खोलेर व्यवसाय सञ्चालनको वातावरण तयार गरिदिन आग्रह गर्दै ज्ञापनपत्र बुझाएका हुन् । व्यवसायीहरुको ज्ञापनपत्र बुझ्दै परराष्ट्रमन्त्री खड्काले तातोपानी नाका तत्काल खुला गर्ने प्रयास भइरहेको बताए । मन्त्री खड्काले नाका सहज रुपमा सञ्चालन गर्नका लागि चिनियाँ पक्षहरुसँग पनि कुरा गरिरहेको जानकारी दिए ।

उनले चिनियाँ पक्षसँगको भेटमा पनि नाका सञ्चालन गर्ने कुरामा विशेष जोड दिने प्रतिबद्धता जनाए । उनले दशैंभन्दा अघि नै आपूर्ति सहज हुने हिसाबले सकारात्मक नतिजा दिने बताए । उनले दशैंभन्दा अघि नै आपूर्ति सहज हुने हिसाबले सकारात्मक नतिजा दिने बताए । उनले सोमवार चिनियाँ जन कंग्रेसका स्थायी समिति अध्यक्ष ली चान्सु नेपाल आउने र मंगलबार आफूसँग शिष्टाचार भेट गर्ने कार्यक्रम रहेको उल्लेख गर्दै उनीसँगको भेटमा नाका सञ्चालनको बारेमा कुरा राख्ने बताए । प्रतिनिधि सभाका सभामुख अग्निप्रसाद सापकोटाको निमन्त्रणामा चान्सु सोमबार ४ दिने नेपाल भ्रमणमा आउँदै छन् ।

सो भेटमा सिन्धुपाल्चोक उद्योग वाणिज्य संघका अध्यक्ष होमबहादुर बस्नेतले तातोपानी नाका २०७२ सालको जस्तै गरी सञ्चालन गरे व्यवसायीहरुले राहत पाउने बताए । उनले परराष्ट्रमन्त्रीले यसबारेमा पहल गरिदिने र चाँडै व्यापार, व्यवसायको व्यवस्थापन हुनेमा आफू आशावादी रहेको बताए । अध्यक्ष बस्नेतले व्यावसायीहरु आफ्नो लगानी डुब्ने अवस्थामा रहेको चिन्तित भएको भन्दै नाका तत्काल सञ्चालन हुनुपर्नेमा जोड दिएका थिए ।