ठूलोसिरुवारी बन्यो सिन्धुकै पहिलो बालमैत्री वडा

चौतारा । चौतारा साँगाचोकगढी वडा नं. १३ ठूलोसिरुवारी जिल्लाकै पहिलो बालमैत्री वडा घोषणा भएको छ ।

५८औँ राष्ट्रिय बाल दिवसको अवसरमा वडा नं. १३ लाई बालमैत्री वडा घोषणा गरिएको हो । आवश्यक सूचकहरू पुरा गरेपछि बुधबार एक समारोहबीच चौतारा साँगाचोकगढी नगरपालिकाका प्रमुख कृष्णप्रसाद सापकोटाले उक्त वडालाई बालमैत्री वडा घोषणा गरे । यो आर्थिक वर्षमा कम्तीमा दुई वटा वडा बालमैत्री घोषणा गर्ने योजना रहेको प्रमुख सापकोटाको भनाई छ ।

घोषणापछि बाल संरक्षणका साथै बालअधिकारको सुनिश्चित गर्न सम्बन्धित सरोकारवालाले सार्वजनिक प्रतिवद्धता ब्यक्त गरेका छन् । स्थानीय तह सञ्चालन ऐन २०७४ ले दिएको अधिकार प्रयोग गरी यो वडा बालमैत्री स्थानीय शासन वडा घोषणा भएको हो । उक्त ऐनले स्थानीय तहलाई बालमैत्री बनाउन सक्ने व्यवस्था गरेको छ । २०७६ सालबाट नै नगरपालिकालाई बालमैत्री नगर बनाउने उद्देश्यका साथ पहलकदमी हुँदै आएको थियो । सोही पहलकदमीका कारण वडा न १३ बालमैत्री वडा घोषणा गर्न सफल भएको वडाध्यक्ष रामप्रसाद गौतमले बताए । बालमैत्री वडाका लागि आवश्यक ५१ सूचक पार गरिसकेको उनलेले बताए । सबै सुचकहरुमा न्यूनतम ८० वा त्यो भन्दा माथिको अंक प्राप्त गरेपछि बालमैत्री वडा घोषणा गरीएको गौतमले बताए ।

नगरपालिकाको बार्षिक नीति तथा कार्यक्रममा २०७६ साल बाट नै नगरपालिकालाई बालमैत्री नगर बनाउने उद्देश्य अनुसार सो वडालाई बालमैत्री वडा घोषणा गरिएको हो । २०७६ पछि बालबालिकामा हुने कुनै पनि प्रकारको अमानवीय घटनाहरू देखा नपरेको वडाको तथ्याङ्क छ । वडा बाल समितिका अनुसार वडामा बालविवाहमा न्यूनिकरण तथा आर्थिक वर्ष २०७८/०७९ मा कुनै पनि बालविवाहको घटना भएको पुष्टि भएको छैन । खानेपानी तथा सरसफाईमा यो वडा निकै अगाडी रहेको तथा सबै सूचकाङ्क पूरा गर्न कम्तिमा एक बर्ष लाग्ने भएकाले आगमी वर्ष पूर्ण सरसफाई युक्त वडा घोषणा गर्ने योजना रहेको वडा अध्यक्ष गौतमले बताए ।

दिवसकै अवसर पारेर बालबालिका सम्बन्धी निबन्ध लेखन प्रतियोगिता समेत गरिएको थियो ।