सिर्जना वाचन गरी मनाईयो प्रलेसको स्थापना दिवस

चौतारा । प्रगतिशील लेखक संघ नेपालको ७१औं स्थापना दिवसको अवसरमार अन्र्तरक्रिया एवम् सिर्जना वाचन गरी मनाईएको छ ।

प्रगतिशील लेखक संघ सिन्धुपाल्चोकले सदरमुकाम चौतारामा एक कार्यक्रम गरी स्थापना दिवस मनाएको हो । कार्यक्रममा प्रमुख अतिथि प्रगतिशील लेखक संघ बागमती प्रदेशका सचिव सुन्दर शिरीषले मुलुकको समृद्धिमा लेखकहरूको महत्वपूर्ण भूमिका रहने भन्दै संक्रमणकालिन अवस्थामा लेखकहरुले आफ्ना सिर्जनाशक्तिको प्रयोग गर्नुपर्नेमा जोड दिए ।

‘७१ वर्ष अघि स्थापना भएको लेखकहरुको यो समूहले मूलुकको राजनीतिक परिवर्तनमा अतुलनीय भूमिका निभएको छ’, सचिव शिरीषले भने– ‘अहिले देश राजनैतिक संक्रमणको अवस्थामा छ, यो अवस्थाबाट मूलुकलाई पार लगाउन लेखकहरु अझैं सक्रिय हुन जरुरी छ ।’ मुलुकको संस्कृति, पर्यटन, भविष्य लगायतका हरेक विषयमा प्रगतिशील लेखकहरूको क्रियाशिल लेखनीले देशलाई गति दिने उनको भनाई थियो ।

कार्यक्रममा नेपाल पत्रकार महासंघ सिनधुपाल्चोकका अध्यक्ष जीवन श्रेष्ठले प्रगतीशील लेखकहरुले प्रगतिउन्मूख सिर्जनाहरुमा ध्यान नदिएको बताउँदै त्यसतर्फ लाग्न आग्रह गरे । सो कार्यक्रममा स्रष्टाहरुले सिर्जना वाचनसमेत गरेका थिए । प्रलेस सिन्धुपाल्चोकका सचिव दील कार्कीले सञ्चालन गरेको कार्यक्रम प्रलेसका जिल्ला अध्यक्ष निर्मल बस्नेतको अध्यक्षतामा भएको थियो ।